Ուրախ ավտոբուսը՝ Երեւանում
Այսօրվանից ուրախ ավտոբուսը՝ joy-bus-ը, որ այլ կերպ կկոչվի Մեկ ավտոբուս, կշրջի Երեւանում՝ ժամը 12-ից մինչ 20. 00: Այն լինելու է անվճար եւ ունենալու է որոշակի երթուղի՝ երեւանցիներին հայտնի ռայկոմից, Կոմիտասի պողոտայով, Սայաթ-Նովայով, Խանջյանով ու Մաշտոցի պողոտայով մինչեւ Հանրապետության հրապարակ:
Ուրախ, անվճար ավտոբուսը երեւանցիների համար կգործի շուրջ երեք ամիս, նպատակը՝ ուրախություն սփռել Երեւանում: Այս գաղափարի հեղինակը
<Ուան Արմենիա> (1Armenia) շահույթ չհետապնդող կազմակերպությունն է:
Ոչ աշխատանքային օրերին ավտոբուսը կտրամադրվի այն կազմակերպություններին, որոնք որեւէ մշակութային միջոցառում են իրականացնում: Ավտոբուսի ներսում երթուղու ընթացքում լինելու են խաղեր, կիթառով երաժշտություն:
Կազմակերպությունն ունի նաեւ առաջարկությունների տախտակ: Ծրագրի բացման ժամանակ, որն ի դեպ ուղեկցվում էր DJ Վակցինայի երաժշտությամբ, մեր քաղաքացիները առաջարկներ էին ներկայացնում: Ըստ այդմ էլ, ինչպես նշեց ծրագրի համակարգող Ռայա Սարգսյանը, կքննարկվեն ավտոբուսի հետագա անելիքները:
Քաղաքացիներից մեկը, ողջունելով, նախագիծը, պարզապես տախտակի վրա ուրախություն հայտնեց, որ Հայաստանում գոնե անվճար ինչ-որ բան կա; Մեկ ուրիշն էլ առաջարկում էր ֆուտբոլի օրերին անվճար խաղադաշտ տեղափոխել մարդկանց:
