«Զվարթնոց»-ում հայտնաբերել են ԱՄՆ քաղաքացու, որը հետախուզվում էր սպանության մեղադրանքով
Ոստիկանության «Զվարթնոց» օդանավակայանի գծային բաժնի ծառայողների ձեռնարկած օպերատիվ-հետախուզական միջոցառումների շնորհիվ՝ սեպտեմբերի 7-ին, ժամը 22.05-ին, գծային բաժին բերման է ենթարկվել Մոսկվա-Երևան չվերթի ուղևոր, ԱՄՆ քաղաքացի, 1967 թ. ծնված Ալեքս Կառա Թ.-ն, նույն ինքը՝ Անաստաս Կարապետի Թ.-ն, որը 2001 թ. դեկտեմբերի 1-ից ոստիկանության Կենտրոնականի բաժնի կողմից հետախուզվում էր ՀՀ քրեական օրենսգրքի 104 հոդվածի 2-րդ մասի 6-րդ կետի մեղադրանքով (Սպանությունը, որը կատարվել է շատերի կյանքի համար վտանգավոր եղանակով): Խափանման միջոցը` կալանք: Անաստաս Թ.-ի հայտնաբերման մասին հայտնվել է հետախուզումը նախաձեռնողին: Ի ԼՐՈՒՄՆ 1992 թ. մայիսի 22-ին, ժամը 15.00-ի սահմաններում, անհայտ անձինք Երևանի Մայակովսկու և Բուռնազյան փողոցների խաչմերուկում ՎԱԶ-2109 մակնիշի ավտոմեքենայից ինքնաձիգից կրակահերթ էին արձակել, ինչի հետևանքով սպանվել էին Երևան քաղաքի բնակիչներ Սոս Ե.-ն և Հայկ Հ.-ն: Փաստի առթիվ հարուցվել էր քրեական գործ: Ձեռնարկված միջոցառումների շնորհիվ պարզվել է, որ նշված հանցագործությունը կատարել են Անաստաս Թ.-ն, Սմբատ Գ.-ն, Արմեն Կ.-ն և Էդիկ Մ.-ն: Անաստաս Թ.-ի նկատմամբ որոշում է կայացվել որպես մեղադրյալ ներգրավելու մասին և խափանման միջոց է ընտրվել կալանքը:
