Մեր տատիկները չգիտեն, որ թմրանյութից են բլիթ պատրաստում (տեսանյութ)
Մեր տատիկները գյուղերում կանեփի սերմերից տարբեր տեսակի բլիթներ ու սննդամթերք են պատրաստում, սակայն նրանց մտքով անգամ չի անցնում, որ դա թմրանյութ է ու չի կարելի աճեցնել: Այսօր լրագրողների հետ զրույցում նկատեց ՀՀ Վճռաբեկ դատարանի քրեական պալատի նախագահ Դավիթ Ավետիսյանը` անդրադառնալով թմրամիջոցների ապօրինի շրջանառությանը: Նա պատկերավոր նկարագրեց այդ իրավիճակը. «Հանկարծ հայտնվում է ոստիկանն ու տատիկին ասում` դու կատարել ես քրեորեն պատժելի արարք` «Քրեական օրենսգրքի» 273 հոդվածով նախատեսված:Այս տատիկն ասում է` ինչո՞ւմն է դա արտահայտվում, ասում են նրան` ապօրինի ես ցանել, իսկ տատիկին ասում է` ո՞րն է օրինական ցանելու կարգը, ոստիկանը կդժվարանա դրան պատասխանել»: Պարոն Ավետիսյանը հիշեցնում է` պատահական չէ, որ այն կոնվենցիաները, որոնք մեր երկիրը ստորագրել է, մեր առաջ պարտավորություններ են դնում` օրենսդրության մակարդակով մշակել կարգ` այդ բույսերը օրինական ցանելու ու աճեցնելու մասին:
