Հաշմանդամություն ունեցող երեխան առանց տանիքի է
Կորցրած առողջության դիմաց արդեն 10 տարի իրենց փոխհատուցումը չստացած օդաչուներն այսօր նոր պաստառով էին եկել կառավարության շենքի մոտ: «Արդեն 3-րդ պաստառն ենք փոխում, ամեն անգամ թազացնում ենք, որ մեր ղեկավարության ուղեղը ավելի լավ աշխատի, որպեսզի ուշադրություն գրավի: Հիմա Հայաստանում այնպիսի վիճակ է, որ ղեկավարությունը մտածում է միայն իր գրպանի համար»,- ասաց նա նախկին օդաչու Սեյրան Սարգսյանը: Փոխհատուցում են պահանջում նաեւ Հյուսիսային պողոտայի նախկին բնակիչները: Կառավարության շենքի մոտ են նաեւ անտուն մնացած Կոնդի նախկին բնակիչները, որոնք որոշեցին փակել Տիգրան Մեծ պողոտան՝ վարչապետի ուշադրությանն արժանանալու համար։ Ոստիկանները միանգամից պատ կազմեցին: «Երբ են փոխհատուցելու, թող օր ասեն, ինչքան կարելի է: Օրը ցերեկով եկան մարդկանց տները տրակտորով քանդեցին, թե շենք ենք սարքում: Դե թող սարքեն, մարդիկ մնացել են փողոցներում: Կառավարությունն է ծախել մեր հողերը, հիմա մենք եկել ենք, որ մեր պայմանագրերը ծախենք իրանց վրա»,- ասաց Կոնդի նախկին բնակիչ Մհեր Կարախանյանը: Կառավարության շենքի մոտ արդարություն է փորձում գտնել նաեւ Արագածոտնի մարզի Ծաղկահովիտ համայնքի բնակիչ Արայիկ Սարդարյանը՝ հաշմանդամություն ունեցող իր երեխայի հետ: Գյուղում շենք է կառուցվել, որից այդպես էլ իրենց բնակարան չի հասել։ Ի զարմանս նրա՝ ստացողների մի մասը բնակարանի կարիք չի ունեցել։ «Սոցիալապես անապահով եմ, չունեմ ոչ մի սեփականություն, չունեմ մշտական աշխատանք, կան մարդիկ, որոնք երկհարկանի առանձնատուն ունեն: Կա ընտանիք, որ մեր գյուղից չէ: Ես դիմումը գրել եմ, որ բացահայտեն»,- նշեց նա: Դատախազությանը նամակներ է գրել, պատասխաները նրան չեն բավարարել։ Խնդիրը այսօր էլ ներկայացրել է Կառավարության աշխատակազմի դիմում- բողոքների ընդունման բաժնի պետ Ալեքսանդր Ղազարյանին: «Ասեց դա կոռուպցիա չէ, դա այլանդակություն է»: Արայիկ Սարդարյանը նամակով դիմելու է Հովիկ Աբրահամյանին՝ դրան կցելով նաեւ դատախազության պատասխանները:
