Տիգրան Հայրապետյանը զգուշացրել էր Վազգեն Սարգսյանին (տեսանյութ)
Հրապարակախոս և վերլուծաբան Տիգրան Հայրապետյանի հարազատներն ու ընկերները նրա ծննդյան օրը տոնում են այլ պայմաններում: Նրանք չեն հավատում, որ հրապարակախոսի կյանքը 17 տարի առաջ խլած մարտի 9-ի ավտովթարը կարող էր պատահականություն լինել:
«Շատ լավ գիտեինք, որ նրան և սպառնում էին և զանգահարում էին, ամեն ձևի ահաբեկումներ եղել են մինչ այդ»,-«Ա1+»-ի հետ զրույցում նշեց Տիգրան Հայրապետյանի ընկերներից Սամվել Մելքոնյանը:
Տիգրան Հայրապետյանի վերլուծական հոդվածներն ու քաղաքական հայացքներն էլ հարազատների պնդմամբ՝ բնավ դուր չէին գալիս այն ժամանակվա իշխանություններին:
«Օրինակ կոնկրետ Վազգեն Սարգսյանի մահը ինքը գրել էր իր հոդվածներում, որ նա լինելու է առաջին զոհը Ռոբերտ Քոչարյանի , այնպես որ թող զգուշանա, բայց ինչպես տեսանք Վազգեն Սարգսյանը դաս չքաղեց, ինչի արդյունքում ունենք այն ինչ-որ այսօր ունենք»,-շեշտեց Սամվել Մելքոնյանը:
1999թ-ի մայիսի 9-ին Երևանի Քանաքեռ-Զեյթուն վարչական շրջանի առաջին ատյանի դատարանը Տիգրան Հայրապետյանին վրաերթի ենթարկած Անդրանիկ Մաշակարյանին մեղավոր է ճանաչել և դատապարտել 4 տարվա ազատազրկման: Տուժող կողմից դատական նիստին ներկա է եղել միայն Սամվել Մելքոնյանը: Վերջինս այս համատեքստում ընդգծում է, որ դատարանը շատ իմիջայլոց էր քննում գործը:
«Դատարանը ինչ-որ պատիժ էլ սահմանեց, դա էլ ինձ թվում է ուղղակի ձևի համար, որ իբր մեր կողմից բողոքներ չլինեն»,-ասաց նա:
Ամեն տարի այս օրը Մխիթար Սեբաստացի կրթահամալիրում Տիգրան Հայրապետյանի ծննդյան տոնին նվիրված միջոցառումներ ու հասարակագիտական ստուգատես է իրականացվում: Կրթահամալիրում գործում է նաև Տիգրան Հայրապետյանի անունով գրադարանը, իսկ այսօր էլ բացվեց նրա անունով ընթերցասրահը: Կրթահամալիրի սաները կազմակերպել էին նաև ռոք- համերգ:
Մանրամասները՝ տեսանյութում:
