Քանդվելու է շենքը, որի հիմքում Աղասի Խանջյանի գլխարկն է (տեսանյութ)
Ի՞նչ տեղի կունենար, եթե բնակարանից վտարեին հայ անվանի դերասաններ Հրաչյա Ներսիսյանին, Բաբկեն Ներսիսյանին, Ավետ Ավետիսյանին կամ Օլգա Գյուլազյանին։ Քանդման հերթում Դերասանների առաջին տունն է, որը կառուցվել է խորհրդային ականավոր գործիչ Աղասի Խանջյանի պատվերով։ «Կառուցման ընթացքում էլ հիմքի մեջ Աղասի Խանջյանն իր գլխարկն է դրել»,- ասում է շենքի բնակիչ Անդրանիկ Մկրտչյանը: Հին Երեւանցու փողոցի այս շենքը, որի պատերի ներսում բազմաթիվ պիեսներ են խաղացվել մինչեւ հանդիսատեսի դատին հանձնվելը, կառավարության որոշմամբ հայտնվել է իրացման գոտում։ Այս անգամ նույնպես ձեռքբերողը Սամվել Մայրապետյանին պատկանող «Լոկալ Դեվելոփերս» ընկերությունն է: «Մեր բնակարանից չենք ուզում գնալ, սովորել ենք, ոնց որ մեր կաշին լինի»: Անդրանիկ Մկրտչյանը վաստակավոր արտիստ Գրիգոր Մկրտչյանի որդին է։ 94-ամյա ռեժիսորը հիվանդանոցում է։ Նրա ընտանիքը բարձրաձայնում է՝ Վճռաբեկ դատարանը պարտավորեցրել է՝ մինչեւ մայիս ազատել բնակարանը՝ հաշվի չառնելով, որ առաջարկվող փոխհատուցումը շատ հեռու է շուկայական գներից։ Համարժեք փոխհատուցում ստանալու համար Տերյան 23,25 եւ Հին Երեւանցու 37 շենքների 23 ընտանիք դիմել է Սերժ Սարգսյանին։ «Որոշ մարդիկ ձեռքները տաքացնում են մեր բնակարանների մեր շենքերի համար: Ես այստեղ ապրում եմ 50 թ-ից, ինձ հանում, գցում է չնչին գումարով, իրանք գումար աշխատեն: Այնպիսի չնչին գումար են տվել, որ մեզ ձեռք են առնում, իրենք են ձեռ առած, մեզ են ձեռ առնո՞ւմ»,- ավելացնում է Անդրանիկ Մկրտչյանը Մինչ Սերժ Սարգսյանից կգա դիմումի պատասխանը, Վճռաբեկ դատարանն արդեն 4 ընտանիքի տնից վտարելու որոշում է կայացրել:
