«Մի ձուկ որսացին, հազարավոր ապագա ձկներ կորան» (տեսանյութ)
Վերջին տարիներին սիգի պաշարները ավելացել են, սակայն դեռեւս սա հիմք չի տալիս ենթադրելու, թե այդ ձկնատեսակի վերացումը կանխվել է: ԳԱԱ Կենդանաբանության եւ հիդրոէկոլոգիայի գիտական կենտրոնի տնօրեն Բարդուխ Գաբրիելյանի խոսքերով՝ կարեւոր է գոնե ձվադրման շրջանում հսկողությունը ուժեղացնել եւ պահպանել. «Ոչ թե մենք տեսնենք մեր շուկաներում սիգը եւ ձկնկիթը դրված դույլերով վաճառվի: Դա նշանակում է, որ մի ձուկ որսացին, հազարավոր ապագա ձկներ կորան»: Նրա խոսքերով՝ եթե ձկների մայրական կազմը եւ մանրաձուկը պահպանվի, ապա պաշարների ավելացումն անխուսափելի կլինի: Նախորդ տարի Սեւանից որսացել են արդյունագործական չափերի 430 տոննա սիգ: Սակայն ձկների ձվադրման համար նախկինում պիտանի համարվող գետերը վաղուց բարենպաստ չեն ձկների բազմացման համար: « Պատճառը գետերի հունը փոխելն է, ազգաբնակչության կողմից գետերը թափվող աղբը եւ ՀԷԿ-երը»,- նշեց Բարդուխ Գաբրիելյանը: Պարոն Գաբրիելյանը հորդորում է որքան հնարավոր է շատ կարաս որսալ: «Այս ձկնատեսակը Սեւանա լճի համար համարվում է ոչ ցանկալի, խանգարում է կողակի և բեղլուի բազմացմանը եւ գրավում է նրանց արուներին»,- ասաց տնօրենը: ԳԱԱ Կենդանաբանության եւ հիդրոէկոլոգիայի գիտական կենտրոնի տնօրենն անդրադարձավ նաեւ Սևանա լճում խեցգետնի պաշարներին՝ նշելով, որ մոտավոր գնահատականներով՝ արդյունագործական չափի խեցգետնի քանակը մոտ է 2 հազար տոննայի է հասնում: Տնօրենի խոսքերով՝ խնդիրը ներկայումս կայանում է նրանում, որ որսագործիքներ են բերվել եւ սելեկտիվ որս չեն կատարում: Որսում են եւ մեծ եւ փոքր խեցգետին:
