Մեղադրանքները խստացվել են, այդ թվում՝ Վահան Շիրխանյանի
Նախորդ տարվա նոյեմբերի 25-ին ԱԱԾ-ի կողմից Նորք Մարաշում վնասազերծված խմբի պարագլուխ ներկայացվող Արթուր Վարդանյանին նոր մեղադրանք է առաջադրվել՝ պետական իշխանությունը յուրացնելուն նախապատրաստվելու հոդվածով: Պաշտպան Լեւոն Բաղդասարյանի խոսքերով՝ Արթուր Վարդանյանը գտնում է, որ մեղադրանքը շինծու եւ չի ընդունում այն: «Նա կարծում է, որ իր նախկին գործունեության հետ կապված հաշվեհարդար է: Մասնավորապես՝ մինչեւ կալանավորվելը նա հայտարարել է, որ օլիգարխիկ բիզնեսը բերելու է տնտեսության քայքայման, տնտեսությունը գտնվում է թշվառ վիճակում, փոփոխություններ չեն արվում, ուստի իշխանափոխություն պետք է լինի: Դրա համար էլ իր կարծիքով իրեն չներվեց, որի արդյունքում մեղադրանքների փունջն է ներկայացվում»,- նշեց պաշտպանը: Լեւոն Բաղդասարյանը չի բացառում, որ հոդվածներն ավելանան: Այս գործի շրջանակներում թվով 20 հոգու նույն մեղադրանքն է առաջադրվել: Խստացվել է նաեւ Պաշտպանության նախկին փոխնախարար Վահան Շիրխանյանի մեղադրանքը: Վահան Շիրխանյանը մեղադրանքը համարել է թատերական բեմադրություն եւ հայտարարել, որ իրական հանցագործները նրանք են, ովքեր մեղադրանքները սարքում են :
