Կալանավորված անձանց հանդիպումները չպետք է սահմանափակվեն
Կալանավորված անձանց հանդիպումները ընտանիքի անդամների հետ չպետք է սահմանափակվեն ։ « Սա այնպիսի հարց է, որ վարույթն իրականացնող մարմինն է որոշում, բայց հարցը լուծելիս մշտապես պետք է ցուցաբերել անհատական մոտեցում: Հաշվի առնել, որ մենք անձին զրկում ենք ոչ թե ընկերոջից կամ որեւէ երրորդ անձից, այլ հարազատ երեխայից, կնոջից : Դուք պատկերացրեք, որքան դժվար է այդ անձի համար»,- ասում է Մարդու իրավունքների պաշտպան Արման Թաթոյանը: Շատ դեպքերում նույնիսկ նախաքննության ավարտից հետո տեսակցությունների արգելքը չի հանվում: Մարդու իրավունքների պաշտպանը կարծում է, որ օրենքով պետք է ավելի հստակեցվեն տեսակցություններն արգելելու հիմքերը: «Ես այն հատուկ զեկույցը, որ պատրաստում եմ, արդեն խմբագրման փուլում է ՊՊԾ գնդի վրա հարձակումների հետ կապված, եւ այնտեղ հատուկ անդրադարձ կա տեսակցությունների արգելքին եւ կան օրենսդրական փոփոխությունների առաջարկներ»: Իրավապաշտպանների գնահատականներով՝ Հայաստանում չի գործում վաղաժամկետ ազատ արձակման ինստիտուտը։ «Ի նպաստ չի դրված եւ չի լուծում վերասոցիալիզացման խնդիրը, զուտ կարծրատիպերով շարժվող կառույց է: Կան որոշակի քրեական հոդվածներ, որոնց վրա չի տարածվում եւ դատապարտվածները չեն կարող մասնակցել: Դա սպանությունն է, առավել ծանր հոդվածները»,- ավելացնում է Քրեակատարողական հիմնարկներում եւ հաստատություններում հասարակական վերահսկողություն իրականացնող հասարակական դիտորդական խմբի ղեկավար Ռուբեն Սարգսյանը: ՄԻՊ-ին առընթեր Խոշտանգումների կանխարգելման փորձագիտական խորհրդի ընդլայնված նիստում Արդարադատության փոխնախարար Սուրեն Քրմոյանը ներկայացրեց մի օրինագիծ, որով հստակեցվում են վաղաժամկետ ազատ արձակման մեխանիզմները: «Կունենանք մի համակարգ, երբ դատապարտյալը մուտք գործելով պետական հիմնարկ կունենա այն չափանիշները, որով առաջնորդվելու դեպքում իր վաղաժամկետ ազատ արձակման հնարավորությունները մեծ կլինեն: Կլինեն խաղի կանոններ, հստակ չափանիշներ եւ դատապարտյալը իր վարքագիծը կհամապատասխանեցնի այդ չափանիշներին, որպեսզի կարողանա պատժի կրումից ազատ արձակվել կամ պատիժը փոխարինել ավելի մեղմ պատժատեսակով»: Փոխնախարարն էլ է ընդունում, որ համակարգի գործունեությունը որոշակի խնդիրներ է առաջացրել եւ բարեփոխման կարիք կա: Քննարկումներից հետո նախագիծը կներկայացվի կառավարություն:
