«Ժիրայր Սեֆիլյանը կիսածանոթ անձանց հետ նման գործողություն կկատարե՞ր» (տեսանյութ)
Փաստաբան Տիգրան Հայրապետյանը դեռ հասցրել է ծանոթանալ «Սասնա ծռերի», նրանց աջակցողների եւ այդ գործին միացված Ժիրայր Սեֆիլյանի մասով 67 հատորից միայն 17-ին: Դատախազությունը որոշել է մինչեւ փետրվար ամիսը երկարացնել քրեական նյութերին ծանոթացման ժամկետը:
Պաշտպան Տիգրան Հայրապետյանը, դեռ ամբողջ նյութերին չծանոթացած, արդեն արձանագրել է նախաքննության բացթողումները։ Օրինակ՝ «Սասնա ծռերին» օժանդակելու մեջ մեղադրվող Կարո Եղնուկյանի գործով՝ նա նույնիսկ նյութերին ծանոթանալու խնդիր չունի, փաստերն ակնհայտ են. «Եղնուկյանի դեմ որեւէ նյութ չկա»:
Փաստաբան Արա Զաքարյանը ստանձնել է Շուշիի առանձնակի գումարտակի հրամանատար Ժիրայր Սեֆիլյանի շահերի պաշտպանությունը։ Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը զավթելու մեջ. «Եթե Ժիրայր Սեֆիլյանը ցանկանար նման գործողություն կատարել, ապա դա առաջին հերթին պետք է իրականացներ իր մտերիմների, համախոհների, մի շարք անձանց մասնակցությամբ՝ օրինակ «Սասնա ծռեր» խմբավորման անդամների: Նրանք ոչ մի կապ չունեն այս գործի հետ: Սա եւս ցույց է տալիս, որ կիսածանոթ անձանց հետ Ժիրայր Սեֆիլյանը պետք է գնար, նման գործողություն կատարեր»։
Պաշտպանը ինչպես այս, այնպես էլ նախորդ տարվա ապրիլի 24-ին ընդառաջ զանգվածային անկարգությունների նախապատրաստման մեղադրանքները համարում է անհիմն:
«Ի սկզբանե մեր խորին համոզմունքն էր, որ այդտեղ հանցակազմ չկա եւ սա սոսկ պատվեր է քաղաքական՝ Ժիրայր Սեֆիլյանին եւ իր համախոհներին մեկուսացնելու համար»,- ավելացնում է Արա Զաքարյանը
Գործի նախաքննության ընթացքի մասին պաշտպանը կարծիք կհայտնի միայն հատորները ուսումնասիրելուց հետո:
