«Պետությունն իր ազատամարտիկին չի հարգում» (տեսանյութ)
Շուշիի ազատագրման հանձնարարությունը կատարվել է փառքով: «Հայոց ազգային բանակ» հատուկ գնդի հրամանատար Սամվել Փափազյանի խոսքերով՝ մի քանի ժամ տեւած ահեղ մարտերից հետո բազմաթիվ զոհեր են ունեցել: Ազատագրման համար ընկած 56 տղաներից 27-ը իրենց ջոկատից են եղել, ունեցել են 2 անհետ կորած: «Մեզ վրա հարձակվեցին մեծաթիվ ազերիներ: Կամ պետք է բոլորս զոհվեինք, կամ հաղթեինք: Վերջում ես վիրավորվեցի, ազատագրված Շուշին տեսա միայն ոտքի կանգնելուց հետո՝ մեկ տարի անց»,- այսօր լրագրողների հետ հանդիպման ժամանակ նշեց Սամվել Փափազյանը: «Սատար հաշմանդամներին» ՀԿ գործադիր տնօրեն Գագիկ Դանիելյանն էլ ավելացրեց, որ հասկանում էին՝ մեռնելու իրավունք չունեն. «Ինչպես մեր հրամանատարն էր ասում՝ մեռնելու հրաման չունենք»: Ազատամարտիկներից Գայանե Բաղդասարյանը, սակայն, այսօր սրտնեղեց՝ իրենց մասին հիշում են միայն այս օրերին և մեկ էլ, երբ ազատամարտիկների կարիք կա: Պետությունն էլ պատշաճ ուշադրություն չի դարձնում նրանց: «Ազատամարտիկը պետությանը գովելու ոչ մի բան չունի: Պետությունն իր ազատամարտիկին չի հարգում: Առաջ, երբ մենք փողոց էինք դուրս գալիս, գալիս էին ձեռքներներս էին պաչում, հիմա ասում են՝ հիմար ես եղել, գնացել ես, ո՞վ է մեղավոր»,- նշեց Գայանե Բաղդասարյանը: Չնայած առկա իրավիճակին՝ հաշմանդամություն ունեցող ազատամարտիկները հարկ եղած դեպքում կրկին պատրաստ են մեկնել ռազմաճակատ, ինչպես ապրիլյան պատերազմի ժամանակ:
