Կզորակոչվեն թե վճարովի, թե անվճար սովորողները. Վիգեն Սարգսյանի ասուլիսը (տեսանյութ)
ՀՀ պաշտպանության նախարար Վիգեն Սարգսյանն այսօր հրավիրված ասուլիսում անդրադարձավ լուրերին, թե առաջիկա զորակոչին բուհերում վճարովի հիմունքներով սովորողներից բացի, զորակոչվելու են նաեւ անվճար հիմունքներով սովորողները: Ըստ նախարարի՝ զորակոչվում են տարկետման իրավունք չունեցողները. «Զորակոչում ենք 18 տարին լրացած քաղաքացիներին՝ ինչպես վճարովի, այնպես էլ անվճար սովորող եւ տարկետման իրավունք չունեցողներին: Տարեկան յոթ-ութ հարյուր արական սեռի քաղաքացի ստանում է տարկետման իրավունք: Հիմնավորումն այն է, որ կիսատ կրթությունը ճիշտ չէ»: Վիգեն Սարգսյանն անդրադարձավ նաեւ իր առաջարկին, որ պաշտոնյաներն իրենց հայտարարագրերում պետք է նշեն զինվորական ծառայություն անցած լինելու մասին. «Դա առաջարկել եմ՝ հաշվի առնելով հանրային հետաքրքրությունը ծառայության հանդեպ: Ցանկացած մարդ, որը հավակնում է զբաղեցնել հանրային պաշտոն, պետք է հայտարարագրում նշի՝ ծառայե՞լ է, թե ոչ, եթե ազատվել է, ինչո՞ւ»: Պաշտպանության նախարարը հավաստիացրեց, որ մինչեւ տարեվերջ ամբողջությամբ լուծված կլինի զոհված զինծառայողների եւ առաջին կարգի հաշմանդամություն ունեցող զինծառայողների անօթեւան ընտանիքների՝ բնակարանով ապահովման խնդիրը։ Ավելին՝ տեսանյութով
