Լևոն Ալթունյանն այցելել է Արցախի դիրքապահ զորամաս
Արցախ կատարած աշխատանքային այցի շրջանակում ՀՀ առողջապահության նախարար Լևոն Ալթունյանը Արցախի նախարար Կարինե Աթայանի և պատվիրակության անդամների հետ երեկ այցելեց դիրքապահ զորամաս: Հրամանատարն առողջպահության նախարարներին տեղեկացրեց, որ վերջին շրջանում ավելի է բարձրացել պաշտպանության բանակի տեխնիկական հագեցվածությունն ու մարտունակությունը` զինվորներին բնութագրելով որպես քաջ տղաներ ու զինվորական գործի գիտակներ:
Լևոն Ալթունյանը շրջեց զորանոցներում, ծանոթացավ Արցախի սահմանն անառիկ պահող զինվորների կենցաղային պայմաններին, զրուցեց նրանց հետ: Բուժկետում նախարարը մասնագետների հետ քննարկեց բուժական, ինչպես նաև զինվորների շրջանում իրականացվող պստվաստումերի կազմակերպական հարցեր: Մասնագետները ներկայացրեցին, որ գրիպի և այլ հիվանդությունների դեմ պատվաստումների շնորհիվ զորամասում հիվանդացությունը կտրուկ նվազել է:
Այնուհետև դիմելով զորամասի շարասյանը` Լևոն Ալթունյանն ասաց.
«Մենք հպարտանում ենք ձեր հայրենանանվեր ծառայությունով և ձեր քաջությամբ: Հայաստանը մշտապես ձեր կողքին է և պատրաստ աջակցելու բոլոր ուղղություններով»:
Նախարարը նշեց, որ իր ղեկավարած պատվիրակությունն Արցախում է գտնվում Հայաստանի առողջապահության ոլորտում իրականացվող բարեփոխումներն Արցախում տեղայնացնելու և ներդնելու նպատակով:
«Լինելով Արցախում, չէի կարող չայցելել ձեզ:
Ջերմորեն շնորհավորում եմ ձեզ և ձեր ընտանիքներին գալիք Ամանորի և Սուրբ ծննդյան տոների կապակցությամբ: Մաղթում եմ առողջություն և խաղաղ ծառայություն հայրենիքին»:
Լևոն Ալթունյանի ղեկավարած պատվիրակությունը զինվորներին ամանորյա նվերներ հանձնեց:
