Գյումրիում հայտնաբերված նորածինների մայրը նոտարական վավերացմամբ հրաժարվել է երեխաներից
Գյումրու Ֆրիտյոֆ Նանսենի անվան գիշերօթիկ հաստատության բակում հայտնաբերված նորածին տղաների մայրը երեկ երեկոյան նոտարական վավերացմամբ հրաժարվել է փոքրիկների խնամքից։ Այս մասին Sputnik Արմենիային հայտնել է Շիրակի մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը։ «Մայրը չունի ո՛չ մասնագիտություն, ո՛չ աշխատանք, բավական երկար աշխատանք տարանք, համոզեցինք, բայց նա հրաժարվեց փոքրիկներից` նշելով սոցիալական ծանր պայմանները։ Երիտասարդ կինը Գյումրի էր եկել մոր հետ, որը նույնպես մենակ է մեծացրել աղջկան»,- ասաց Գորգինյանը։ Հավանաբար այդ դժվարությունները տեսնելով` նրանք նախընտրել են երեխաներին ավելի ապահով ձեռքեր հանձնել։ Պարզվել է նաև, որ փոքրիկները ծնվել են հոկտեմբերի 1-ին, նրանցից մեկի անունը Վահե է, մյուսինը` Վահան։ «Օրեր են եղել, որ ես ինքս եմ սոված մնացել, որպեսզի երեխաներս ոչնչի պակաս չունենան»,- ասել է 18 տարեկան մայրը։ Գորինյանի խոսքով` երկուշաբթի երեխաները կհաշվառվեն որպես առանց ծնողական խնամքի մնացած երեխաներ։ Հետո նրանք պաշտոնապես կհաստատվեն հաստատությունում՝ համապատասխան եզրակացությունով և ուղեգրով, ապա կհաշվառվեն որպես որդեգրման ենթակա երեխաներ։ Նշենք, որ երկվորյակների մորը հայտնաբերել են երեկ` հոկտեմբերի 19-ին։ Ոստիկանությունը հայտնել էր, որ նա Արարատի մարզի բնակիչ է, 18 տարեկան։ Ավելի վաղ հայտնել էինք, որ երեխաներին որդեգրելու ցանկություն հայտնողների իսկական բում է. մի քանի տասնյակ ընտանիքներ հայտնել են, որ ուզում են որդեգրել փոքրիկներին։ Հիշեցնենք` հոկտեմբերի 17-ին, ժամը 20.00-ին, Գյումրու Շիրակացի թիվ 10 հասցեում գտնվող Ֆ.Նանսենի անվան գիշերօթիկ հաստատությունից ոստիկանության Մուշի բաժինն ահազանգ էր ստացել, որ հաստատության բակում հայտնաբերել են երկու բարուրված նորածին տղա երեխաներ: Մեկնած օպերատիվ խումբը պարզել էր, որ նույն հաստատության աշխատակիցները ժամը 19.40-ին հաստատության բակում, գետնին դրված պոլիէթիլենային տոպրակի մեջ բարուրված վիճակում հայտնաբերել են երկու նորածին տղա երեխաների: Երեխաները հանձնվել են Գյումրի համայնքի «Խնամակալության և հոգաբարձության հանձնաժողովի» ներկայացուցչին՝ նրանց հետագա խնամքը կազմակերպելու և համապատասխան հաստատությունում տեղավորելու համար:
