Պետք է բացառել «ասողների ինստիտուտ» երևույթը. Նիկոլ Փաշինյան (տեսանյութ)
Կառավարության հերթական նիստի օրակարգին անցնելուց առաջ, վարչապետի պաշտոնակատար Նիկոլ Փաշինյանն անդրադարձավ առաջիկա ԱԺ ընտրություններին։ Նրա խոսքով՝ այս ընտրությունները անցկացնելու քաղաքական պատասխանատվությունը կրում է իրենց կառավարությունը.« Ընդունված է ասել, որ մենք խնդիր ենք դրել երրորդ հանրապետության պատմության ամենաորակյալ ընտրություններն անցկացնել: Ես կարծում եմ, որ այս նշաձողը պետք է բարձրացնել եւ ասել՝ ոչ թե երրորդ հանրապետության ամենաորակյալ ընտրությունները պետք է լինի , այլ պետք է միջազգային ամենաբարձր չափանիշներին համապատասխան ընտրություններ անցկացնել»,-ասաց Փաշինյանը։ Ըստ նրա, առաջնահերթ պետք է բացառել վարչական ռեսուրսների կիրառումը: «Մասնավորապես, նախկինից հայտնի ավանդույթներ են եղել, երբ այս օրերին, մասնավորապես՝ հանրակրթության ոլորտը ներքաշվում էր քաղաքական պրոցեսների մեջ, պետք է բացառել դա և պետք է այս ընտրություններում արմատախիլ անել այն երևույթը, երբ վարչական լծակները օգտագործվում են ընտրողին այս կամ ուղղությամբ ուղղորդելու համար: Նախկինում եղել է այսպես ասած «ասողների ինստիտուտները», ովքեր ասում էին, թե ում օգտին պետք է քվեարկել, այդ երևույթը ի սպառ պետք է բացառել»։ Փաշինյանը խոստացավ՝ նախընտրական քարոզարշավի ողջ ընթացքում ապահովել քաղաքական ուժերի ազատ մրցակցությունը, պետք է սահմանափակումներ չլինեն դահլիճների հասանելիության առումով, և բոլոր քաղաքական ուժերը հավասար հնարավորություններ պետք է ունենա ընտրողների հետ երկխոսելու և շփվելու համար»։ Վարչապետի պաշտոնակատարն անդրադարձավ նաեւ ընտրացուցակների հետ կապված խնդրին, որի պատասխանատվությունը առաջնահերթ ոստիկանությունն է կրում: Նրա խոսքով՝ նախկինում տեղի ուենցած ընտրողների միգրացիան պետք է ի սպառ բացառել. «Մենք պետք է անցկացնենք իսկապես բարձր մակարդակի ընտրություններ և որևէ կասկած չունեմ, որ այդպիսի ընտրություններ էլ կանցկացնենք»,-եզրափակեց Փաշինյանը։ Կառավարությունը հավանություն տվեց նոյեմբերի 21ին ԱԺ արտահերթ նիստ հրավիրելու առաջարկին։
