Մանվել Գրիգորյանի դեպքում ընտրովի արդարադատություն է գործում. Փաստաբան
Գեներալ Մանվել Գրիգորյանի պաշտպանն ահազանգում է՝ առողջական վիճակը բացասական դինամիկայով գնում է․ «Օրը մեջ էլ իր անձնական բժիշկն է գնում ՔՀԿ եւ միջամտություն կատարում, որովհետեւ բացասական դինամիկան ակնհայտ է»,- ասում է պաշտպան Լեւոն Բաղդասարյանը։ ԱԺ պատգամավոր Մանվել Գրիգորյանը առողջական լուրջ խնդիրներ ունի՝ քաղցկեղ, շաքարային դիաբետ։ Կալանավայրում գտնվելու ընթացքում նա սկսել է ինսուլին ստանալ։ Հունիսի 19-ից կալանավորված Մանվել Գրիգորյանը մեղադրվում է ապօրինի զենք-զինամթերքի շրջանառության եւ զինվորների համար նախատեսված պարենամթերքի, պարագաների յուրացման համար։ Պաշտպանական կողմն այս ամիսների ընթացքում բացմիցս միջնորդություն է ներկայացրել Մանվել Գրիգորյանի խափանման միջոցը փոխելու համար, սակայն այն չի բավարարվել։ «Մանվել Գրիգորյանի դեպքում ընտրովի արդարադատություն է գործում»,- նշում է պաշտպանը։ Մանվել Գրիգորյանի խափանման միջոցը փոխելու հերթական միջնորդությունը Երեւան քաղաքի ընդհանուր իրավասության դատարանը կքննարկի դեկտեմբերի 7-ին։
