ՄՕԿ-ը դադարեցրել է ֆինանսավորել բռնցքամարտը
Միավորված համաշխարհային ըմբշամարտի նախագահ Նենադ Լալովիչը ղեկավարությամբ Միջազգային օլիմպիական կոմիտեի (ՄՕԿ) հանձնաժողովը սկսել է ուսումնասիրել բռնցքամարտի միջազգային ասոցիացիայի (ԱԻԲԱ) ֆինանսական եւ կազմակերպչական հարցերի հետ կապված խնդիրները: Ինչպես հայտնում է ՄՕԿ-ի պաշտոնական կայքը, եթե ԱԻԲԱ-ն առաջիկայում չկարողանա լուծել այդ խնդիրները, ապա այն կկորցնի ՄՕԿ-ի կողմից ճանաչումը, իսկ բռնցքամարտը դուրս կմնա 2020 թվականի օլիմպիական խաղերի ծրագրից: Միջազգային օլիմպիական կոմիտեի գործադիր խորհուրդն արդեն որոշում է կայացրել, ըստ որի դադարեցվել են ԱԻԲԱ-ի եւ Տոկիոյի-2020-ի կազմկոմիտեի միջեւ պաշտոնական շփումները, բռնցքամարտի տոմսերի վաճառքը, չեղարկվել է բռնցքամարտիկների որակավորման համակարգը: Բռնցքամարտի միջազգային ասոցիացիային միաժամանակ արգելվել է գովազդային նպատակներով օգտագործել ՄՕԿ-ի եւ 2020թ օլիմպիական խաղերի տարբերանշանները, օգտվել օլիմպիական մարզակառույցներից: Սառեցվել է բռնցքամարտի օլիմպիական համերաշխության ֆինանսավորումը, պայմանով, որ ազգային ֆեդերացիաները նույնպես վճարումներ չեն կատարի իրենց մարզիկներին: Ի դեպ, ՄՕԿ-ի Գործադիր խորհուրդը պատրաստ է պաշտպանել բռնցքամարտիկների շահերը եւ ապահովել նրանց մասնակցությունը Տոկիոյի օլիմպիական խաղերին, սակայն առանց ԱԻԲԱ-ի մասնակցության:
