Արցախի հիմնահարցի կարգավորման համար նոր օրակարգ է պահանջվում. ՀԴԿ
Սույն թվականի դեկտեմբերի 26-ին Հայաստանի դեմոկրատական կուսակցության կենտրոնական գրասենյակում կայացավ «Ի պաշտպանություն Արցախի հանրապետության» և Մտավորականների խորհրդի համատեղ նիստ: Քննարկման էր ներկայացվել Արցախի հիմնահարցի կարգավորման բանակցային գործընթացի փակուղային վիճակից նոր ելքեր փնտրելու հարցը: Կազմկոմիտեի և ՀԴԿ նախագահ Արամ Սարգսյանի հաղորդման հիմնական թեզը կայանում էր նրանում, որ ԵԱՀԿ Մինսկի խմբի համանախագահների առաջարկած տարբերակները, հատկապես՝ «Մադրիդյան սկզբունքները», որևէ առաջընթաց չեն ապահովել կարգավորման գործընթացում: Իսկ հաճախակի դարձած խոսակցություններն ինչ-ինչ տարածքներ հանձնելու մասին, անիմաստ և վտանգավոր տպավորություն են ստեղծում հնարավոր միակողմանի զիջումների վերաբերյալ: Հստակ շեշտվեց այն հանգամանքը, որ «թավշյա հեղափոխությունից» հետո իշխանություններն ունեն բանակցությունների նոր, հեռանկարային օրակարգ առաջարկելու բոլոր իրավունքները: Օրակարգ ձևավորելու հիմքում պետք է լինի խաղաղ գործընթացի մասին համաձայնագրի ստորագրումը, որի գործողության պայմաններում հնարավոր կլինի հիմնահարցի ամբողջական դիտարկումը և քայլերի հերթականության իրացումը: Նիստի մասնակիցները՝ Արման Նավասարդյանը, Ալեքսանդր Մանասյանը, Լարիսա Ալավերդյանը, Մարիամ Ավագյանը, Ժասմինա Ղևոնդյանը, Կարինե Դանիելյանը, Ազատ Եղիազարյանը և ուրիշներ, իրենց առաջարկները ներկայացրեցին հարցի վերաբերյալ: Որոշվեց.
- Ստեղծել աշխատանքային խումբ, լրացնել Արցախի հիմնահարցին վերաբերող իրավական «թղթապանակը», կազմել բանակցային գործընթացի օրակարգի նախագիծը և առաջիկայում քննարկել այն հաջորդ համատեղ նիստում:
- Մշակված փաստաթղթերը ներկայացնել ՀՀ վարչապետին, ԱԳՆ-ին և Մինսկի խմբի համանախագահներին:
