Կարեն Ղազարյանը ոչ թե գերեվարված, այլ ձերբակալված է. Արտակ Զեյնալյան (տեսանյութ)
«Լուսավոր Հայաստան» խմբակցության պատգամավոր Սարգիս Ալեքսանյանին մտահոգում է, թե կառավարությունը քայլեր ձեռնարկո՞ւմ է փետրվարի 27-ին Ադրբեջանում 20 տարվա անազատության դատապարտված Կարեն Ղազարյանին վերադարձնելու համար: Արդարադատության նախարար Արտակ Զեյնալյանը նշեց, որ մամուլում շատ է գրվում, որ Կարեն Ղազարյանը գերեվարված է, ինչը ըստ նրա՝ սխալ է: «Կարեն Ղազարյանը ոչ թե գերեվարված է, այլ ձերբակալված է, սա էական տարբերություն է: Կարեն Ղազարյանի ներկայացուցիչները Մարդու իրավունքների եվրոպական դատարան գանգատ են ներկայացրել, նաև պահանջել են հրատապ միջոց կիրառել և հիմա այդ գանգատը քննվում է, ու Հայաստանի Հանրապետությունը անպայման կծանուցվի ու Հայաստանը կներգրավվի որպես 3-րդ կողմ: Բացի դրանից, ՀՀ Կառավարությունը օգտագործում է դիվանագիտական բոլոր գործիքներն ու միջոցները, որպեսզի Կարեն Ղազարյանի կյանքը ապահովվի և երաշխավորվի: Ամեն ինչ արվում է նրան իր հայրենիք վերադարձնելու համար: Մենք գտնում ենք, որ Կարենը ապօրինաբար է գտնվում անազատության մեջ և այն, ինչ վերագրվում է Կարենին` չի համապատասխանում իրականությանը»:
