Վիտալի Բալասանյանը բոլոր սահմանները հատել է. Վարուժան Ավետիսյան (տեսանյութ)
Քառօրյա պատերազմը պայմանավորված էր: «Սասնա ծռեր» համահայկական կուսակցության համահիմնադիր Վարուժան Ավետիսյանը Եռաբլուրում նման հայտարարություն արեց՝ լրագրողների հետ զրույցի ժամանակ, ավելացնելով, որ պայմանավորվածությունը Ռուսաստանի և Ադրբեջանի շահերը սպասարկելու նպատակով էր: «Նաև Նիկոլ Փաշինյանը ժամանակին դիպուկ բնութագրել էր որ ապրիլյան պատերազմը արվել էր Ադրբեջանին ԵԱՏՄ մտցնելու նպատակով: Մենք էլ ենք այդ տեսակետը առաջին օրերից արտահայտել»: Ինչ վերաբերում է Արցախի ներգրավումը բանակցային կողմ, ապա ըստ Վարուժան Ավետիսյանի՝ Արցախը չպիտի վերադառնա բանակցային կողմ, որովհետև Արցախը Հայաստանի մարզ է: «Արցախի Հանրապետության սուբյեկտացումը մեզ կտանի դեպի փակուղի և հնարավորություն կստեղծի, որ Ռուսաստանը շահարկի այդ հանգամանքը և արևմուտքին հեռացնելով գործընթացից, միանձնյա կերպով փորձի ապակայունացնել իրավիճակը»: Վարուժան Ավետիսյանը անդրադարձավ նաև օրեր առաջ Արցախի Անվտանգության խորհրդի քարտուղար Վիտալի Բալասանյանի այն կոչին, թե «Սասնա ծռերը» չպիտի հատեն Արցախի սահմանը: «Նա բոլոր սահմանները հատել է, այդ թվում քրեաիրավական առումով: Նա պիտի պատասխանատվության կանչվի իր կատարածի համար՝ Բերձորի դեպքերի համար»: Ավետիսյանը կարծում է, որ Վիտալի Բալասանյանը պիտի զրկվի իր պաշտոնից: «Սասնա ծռեր» համահայկական կուսակցության անդամներ՝ Ժիրայր Սեֆիլյանը, Վարուժան Ավետիսյանը, Հովհաննես Չուքասզյանը, Գևորգ Սաֆարյանը և կուսակցության այլ աջակիցներ Եռաբլուրում իրենց հարգանքի տուրքը մատուցեցին ապրիլյան քառօրյայի զոհերի հիշատակին:
