Ուկրաինայի ԱԳՆ-ն ու Ռադան կարձագանքեն. Ստեփան Գրիգորյան
Երկու օր առաջ Զվարթնոց օդանավակայանի սահմանակետում ուկրաինացի պատգամավորի նկատմամբ կատարվածի վերաբերյալ իր դիրքորոշումն է հայտնել քաղաքագետ Ստեփան Գրիգորյանը։ Նրա խոսքով տեղի ունեցածը կարող է լուրջ հետևանքներ ունենալ Հայաստանի համար:
«Ոչ մեկը չի գա Հայաստան, ներդրում անի, եթե համոզված չի, որ իրեն սահմանում ազատ մուտքի թույլտվություն կտան: Հակադրությունը ԱՄՆ-ի, Ռուսաստանի և Եվրոմիության միջև բավականին լուրջ է: Ո՞վ պետք է ներդրում անի Հայաստանում, առաջին հերթին Եվրոպայից, ԱՄՆ-ից, Ճապոնիայից պետք է գան, այն երկրներից, որոնք Ռուսաստանի հետ լուրջ պրոբլեմներ ունեն, հիմա իրենք կմտածեն, կարո՞ղ են Հայաստան մտնեն ու Ռուսաստանի պատճառով պրոբլեմներ ունենան», - նշում է քաղաքագետը:
Սա միակ մարտահրավերը չի լինի Հայաստանի համար: Քաղաքագետը չի հասկանում, թե ինչու է Հայաստանը ստանձնում ինչ-որ պարտավորություններ, որոնք մեզ հետ կապ չունեն: Ստեփան Գրիգորյանն ընդգծում է, որ տեղի ունեցածը կարող է հայ-ուկրաինական հարաբերությունների վրա ազդեցություն ունենալ:
«Մուսատաֆա Նայեմը հայտնի, լրջագույն պատգամավոր է: Հավաստիացնում եմ, որ Ուկրաինայի և՛ արտգործնախարարությունը, և Գերագույն ռադան կարձագանքեն: Դա մեզ համար անցանկալի հետևանքներ կունենա»,- հավելեց Ստեփան Գրիգորյանը:
Հիշեցնենք, որ Մուստաֆա Նայեմը երկու օր առաջ է ժամանել Հայաստան և բախվել է երրորդ երկրի, այն է Ռուսաստանի Ուկրաինայի նկատմամբ պատժամիջոցներին՝ պատգամավորը «մուտքի արգելքով» որպես անցանկալի անձ է եղել գրանցված:
