Ովքե՞ր են Վերնիսաժից կոբալտե սպասքի հիմնական գնորդները (տեսանյութ)

Հատկապես սովետական ժամանակաշրջանում և 90-ականներին իրենց զավակներին  ամուսնացնելուց առաջ ծնողները սկսում էին օժիտ պատրաստել, որի մեջ առանձնահատուկ տեղ էին զբաղեցնում կոբալտից չեխական կամ գերմանական արտադրության սպասքը,  ճենապակե  ծաղկամանները, մրգամանները,  թանկարժեք խեցուց արձանիկները և այլ իրեր: Այսօր սակայն, այդ ավանդույթը քչերի մոտ է պահպանվել:

Վերնիսաժում  նմանատիպ ապրանքներ վաճառողներն ասում են, որ քսան տարուց ավելի այդ գործով են զբաղվում, բայց հիմա այլևս օժիտի համար նման իրեր չեն գնում:      

Վաճառողները նշում են, որ մրցակցությունը մեծ է, բայց ոչ մեկի առևտուրն էլ լավ չի, ամիսներով  չեն կարողանում որևէ բան վաճառել, և հաճախ ապրանքը պարտքով են գնում,  բայց չեն դժգոհում և հույս ունեն, որ ժողովրդի սոցիալական վիճակը բարելավվելուց հետո իրենց գործերն էլ կլավանան:

Գերմանական սպասք և չեխական արձանիկներ վաճառող տիկին Գրետան ասում է, որ  գերմանական սպասքն ավելի թանկ արժե, քան չեխականը:  Իսկ իրենց ապրանքներով հիմնականում  հետաքրքրվում են  50-60 տարեկանները և ավելի շատ՝ օտարերկրյա քաղաքացիներ:

Եվ հենց «Ա1+»-ի հետ զրույցի ժամանակ տաղավարին մոտեցավ ռուս զբոսաշրջիկ Մարինա  Կոլոսկովան: Վերջինս նշեց, որ առաջին անգամ է Հայաստանում և շատ տպավորված է մեր երկրով:

 «Ես ընդամենը  չորս օրով եմ Հայաստանում,  եղել եմ Ջերմուկում, Դիլիջանում, Գառնի-Գեղարդում: Ձեր երկիրը պարզապես ֆանտաստիկա է, ես այուհետև կգամ այստեղ հանգստանալու, երևի  Ջերմուկ: Ես շուկաներ սիրում եմ,  ինձ խորհուրդ տվեցին լինել Վերնիսաժում: Ես ուղղակի հիացած եմ,  ուզում եմ այսպիսի որևէ հին բան գնել, բայց չգիտեմ ինչպես տանել։ Շատ գեղեցիկ արծաթյա իրեր կան, որոնց կողքով անտարբեր չես կարող անցնել: Շնորհակալություն Հայաստանին՝ այսպիսի ընդունելության համար»,- ասաց Մարինա Կոլոսկովան:

Մարինա Կոլոսկովան նաև ասաց, որ ինքը շատ հայ հարևաններ ունի, որոնք իրեն ճանապարհել են Հայաստան:

Մանրամասները՝ տեսանյութում: