Վարկ վերցնելիս չօգտվել միջնորդների ծառայություններից. «ՎՏԲ» բանկի արձագանքը՝ խարդախության զոհ դարձած ցուցարարներին

«ՎՏԲ» բանկի հայաստանյան գրասենյակն արձագանքել է «Ա1+» լրատվականի «Վեց ընտանիք բնակարան կորցնելու վտանգի առջև է կանգնած» վերնագրով հրապարակմանը։ 

Բանկի հաղորդագրությունը ներկայացնում ենք ստորև.

«26 հուլիս 2019 թ.

Ի պատասխան a1plus.am կայքում հրապարակված տեսանյութի հայտնում ենք, որ Բանկի ներկայացուցիչները հանդիպել են այն հաճախորդներին, որոնք բողոքի ակցիա էին կազմակերպել ՀՀ Կառավարության շենքի դիմաց և պարզել բողոքի պատճառները:

Ըստ Հաճախորդների` գործել է գործողությունների մի սխեմա, որտեղ 3-րդ անձը (միջնորդը), ձեռք բերելով իրենցվստահությունը և մոլորեցնելով իրենց,համոզել է, որպեսզի նրանք իրենց անվամբ «ՎՏԲ-Հայաստան Բանկ» ՓԲԸ-ում ձևակերպեն ոսկու գրավով ապահովված վարկեր`գրավադրելով միջնորդի ոսկյա իրերը: Վերցնելով վարկի ողջ գումարը` միջնորդը չի մարել վարկը` այդ մասով ամբողջ պատասխանատվությունը թողնելով Բանկի Հաճախորդների վրա, ինչը հանգեցրել է պարտքի բռնագանձման նպատակով վերջիններիս նկատմամբ դատական գործընթացներ սկսելուն:

ՎՏԲ-Հայաստան Բանկը խորհուրդ է տալիս, ցանկացած տեսակի վարկ վերցնելիս (եթե նույնիսկ դրա ապահովման միջոց հանդիսացող գրավի առկա-ոսկյա իրերը պատկանում են միջնորդին),  չօգտվել միջնորդների ծառայություններից և դիմել Բանկ ինքնուրույն:

Բանկը զգուշացնում է, որ նման դեպքերում վարկային պարտավորությունների չկատարման և հետագա բացասական հետեւանքների համար ամբողջ պատասխանատվությունըկրում է միայն վարկառուն»:

Հիշեցնենք, որ հուլիսի 11-ին  Երևանի Վարդանանց 109 հասցեի բնակիչ Արմենուհի Գաբրիելյանն ու Սասունցի Դավիթ 40 հասցեի բնակիչ Վերգինե Ղազարյանը կառավարության դիմաց բողոքի ակցիա էին իրականացնում։

«Ա1+»-ի հետ զրույցում նրանք ասել էին, որ «ՎՏԲ» բանկում իրենց ծանոթի խնդրանքով ոսկու գրավադրում են ձևակերպել, իսկ գրավադրման լուծարվելուց հետո բանկից տեղեկացրել են, որ  30 տոկոս տոկադրույքով վարկ է ձևակերպված իրենց անունով։ Նրանք նշել էին, որ այս խնդրով 6 ընտանիք բնակարան կորցնելու վտանգի առջև է կանգնած: