Ավստրալիայի վարչապետ Սքոթ Մորիսոնը խոստովանել է, որ անտառային հրդեհների դեմ պայքարի ուղղությամբ երկրի իշխանությունների գործողությունները միշտ չէ, որ արդյունավետ են եղել եւ այժմ մանրակրկիտ վերլուծության կարիք ունեն:

 

Այս մասին տեղեկանում ենք ԲԲՍ-ից։

 

Էյ-Բի-Սի հեռուստաալիքին տված հարցազրույցում Մորիսոնը հայտարարել է, որ առաջացած խնդիրներից մի քանիսն ինքը կարող էր շատ ավելի լավ հաղթահարել:

 

«Սա շատ զգայուն, շատ զգացմունքային միջավայր է։  Վարչապետներն էլ են միս ու արյունից, երբ համագործակցում են այդ (անտառային հրդեհներից տուժած) մարդկանց հետ», - ասել է վարչապետը։ 

 

Մորիսոնը հատկապես հիշատակել է հրշեջների ծանր աշխատանքը տարերքի դեմ պայքարում, ինչպես նաեւ նշել է, որ կառավարությունը պետք է ավելի ակտիվ դերակատարում ունենա այդ խնդիրների լուծման գործում:

 

Վարչապետը հայտարարել է հրապարակային հետաքննություն սկսելու մասին, որը պետք է պարզի, թե որքանով են արդյունավետ իշխանությունները գործել ճգնաժամային իրավիճակում ։