Հայաստանը չի բացառում փախստականների հոսք Իրանից (տեսանյութ)

Իրանից զանգվածային ներհոսք դեպի  Հայաստան առայժմ չկա, բայց  համապատասխան կառույցները չեն բացառում դա  տարածաշրջային լարվածության  ֆոնին։

  «Հույս ունենք, որ տարածաշրջանում իրավիճակը չի լարվի, բայց մենք պետք է պատրաստ  լինենք ցանկացած զարգացման»,- նշում է Սփյուռքի գործերով Գլխավոր հանձնակատարի գրասենյակի Հայրենադարձության բաժնի պետ Հովհաննես Ալեքսանյանը։  Եթե սկսվի Իրանից զանգվածային ներհոսք, ապա ծանրաբեռնվածությունը լինելու է Մեղրիի անցակետից։

 «2019թ․առաջին 9 ամիսների ընթացքում ունեցել ենք 167 ապաստանի հայց, որից 67-ը Իրանի քաղաքացիներ են․ 20-ին տվել ենք փախստականի կարգավիճակ, 30-ը մերժվել են շատ տարբեր պատճառներով», տեղեկացրեց  ՀՀ ՏԿԶՆ միգրացիոն ծառայության հանրային կապերի պատասխանատու Նելլի Դավթյանը։

Ներհոսք սպասվում է ոչ միայն  Իրանից։ Մերձավոր Արեւելքում լարվածությունը ցանկացած պահի կարող է նման հոսքերի առիթ դառնալ։

«Այս հարաբերական խաղաղ պայմաններում անգամ մենք ունենք ներհոսք․ հունվարի 8-ին մենք 4 լիբանանյան ընտանիք ենք ընդունել», - տեղեկացրեց  Հովհաննես Ալեքսանյանը։

Խոշոր աղետների կամ ռազմական գործողությունների հետևանքով առաջացած միգրացիոն հոսքերի կառավարման գործողությունների պլանը քննարկման փուլում է։ Պատասխանատու նշանակված է ԱԻՆ-ը։

«Զանգվածային ներհոսքը պետք է կարգավորվի կառավարության կողմից, իսկ մնացած գործառույթները ԱԻՆ-ը բաշխել է 20 տեղական գերատեսչությունների միջև և  կարգավորվում են այս նախագծի միջոցով։ Անկախ աշխարհաքաղաքական իրավիճակից, կամ հարևան երկրում տեղի ունեցող կարգավիճակից՝ ԱԻՆ կողմից առաջարկվող նախագիծը ավելի քան իրատեսական է»,- նշում է ՀՀ ՏԿԶՆ միգրացիոն ծառայության հանրային կապերի պատասխանատու Նելլի Դավթյանը։

Հայաստանն ունեցել է փորձ զանգվածային ներհոսք կարգավորելու։

«Երկիրը համապատասխան ռեսուրսներ կարողացել է ներդնել, բայց դրանք բավարար չեն եղել։ Դա եղել է Իրաքի դեպքը, և Սիրիայում շուրջ 8-9 տարի ձգվող պատերազմական իրավիճակում սիրիահայերի ներգաղթը»,- հայտնեց  Հովհաննես Ալեքսանյանը։

 Սիրիայից ՀՀ-ն ընդունել է 22000-ից ավելի փախստականի։