«Երաշխավորում եմ՝ որևէ մեկին Ծաղկաձորում վնաս չի սպառնում»․Վաղարշակ Հակոբյան (տեսանյութ)
Աջակցիր «Ա1+»-ին«Իմ քայլը» խմբակցության պատգամավոր Վաղարշակ Հակոբյանը ԱԺ հայտարարությունների ժամին անդրադարձավ կորոնավիրուսի վտանգով պայմանավորված՝ Ծաղկաձորի «Գոլդեն Փելես» հյուրանոցում մեկուսացած անձանց և հնչող հայտարարություններին, թե տնտեսվարողներն ահազանգում են, որ դրա պատճառով Ծաղկաձորում հյուրանոցները դատարկվել են:
«Այն, ինչ տեղի է ունեցել, ոչ ոք չէր ուզենա, բայց պետական այնպիսի օբյեկտին, որը մեկուսացված լինի այդպիսի տարածաշրջանում և այդ պայմաններում, դրան այլընտրանք գոյություն չուներ, որովհետև բոլոր պետական օբյեկտները մասնավորեցվել են, վաճառվել են, այդ գումարները լափվել են բազմաթիվ նախկին իշխանավորների կողմից և այլն: Այնպես որ, այստեղ երկրորդ կարծիք լինել չի կարող: Ցավալի է, որ նման դեպք է տեղի ունեցել, բայց նրանք մեր հայրենակիցներն են, և նրանց պետք է ցույց տրվեր արժանի վերաբերմունք», - ասաց պատգամավորը:
Հակոբյանը կոչ արեց խուսափել խուճապահար տրամադրություն տարածելուց և հանգստի ցանկություն ունենալու պարագայում այցելել Ծաղկաձոր։
«Ես ձեզ երաշխավորում եմ, որ որևէ մեկին Ծաղկաձորում վնաս չի սպառնում, և սեփական օրինակով ապացուցելու եմ դա գալիք ոչ աշխատանքային օրերին», - վստահեցրեց նա:
