Թուրքիան մեզ համար անվտանգության ուղղակի սպառնալիք է․ Տաթևիկ Հայրապետյան (տեսանյութ)
Աջակցիր «Ա1+»-ինԱԺ հայտարարությունների ժամին «Իմ քայլը» խմբակցության պատգամավոր Տաթևիկ Հայրապետյանը նշեց, որ Թուրքիան մեզ համար անվտանգության ուղղակի սպառնալիք է․
«Քաղաքականությունը, որը Թուրքիան այսօր վարում է Սիրիայում, իր գործելաոճով ամբողջությամբ կրկնում է 20-րդ դարի սկզբին հայերի հանդեպ տեղի ունեցած ոճրագործությունները», - ասաց նա:
Ինչ վերաբերում է Թուրքիայի ԱԳ նախարարի հանդիպմանը ԵԱՀԿ Մինսկի համանախագահների հետ, պատգամավորն ընդգծեց, որ սա առաջինը չէ և Թուրքիան՝ որպես ԵԱՀԿ անդամ երկիր, մշտապես փորձել է գերազանցապես ներգրավված լինել Ղարաբաղյան հակամարտության հարցի կարգավորման բանակցային գործընթացում, ինչը նրան երբեք չի հաջողվի.
«Թուրքիան հստակ կողմնակալ ադրբեջանամետ դիրքորոշում ունի իր բոլոր հայտարարություններով, գործելաոճով և դեռևս 1993 թվականին սահմանը փակելով Հայաստանի հետ՝ հստակ արտահայտել է իր դիրքորոշումը: Եթե Թուրքիան իսկապես ուզում է ներդրում ունենալ հակամարտության լուծման գործընթացում, ապա նրա լավագույն ներդրումը կլինի հնարավորինս հեռու մնալ Ղարաբաղյան հարցի կարգավորման և բանակցային գործընթացին ուղղված քայլերից, որովհետև բացի վնասից այլ ազդեցություն Թուրքիան ունենալ չի կարող», - եզրափակեց Հայրապետյանը։
