Հնարավորինս պետք է պաշտպանված լինի նաև ՀԿ-ների գործունեության ազատությունը․ Անի Սամսոնյան (տեսանյութ)
Աջակցիր «Ա1+»-ին«Միավորումների ազատության ապահովումը հիմնարար նշանակություն ունի քաղհասարակության զարգացման համար։ Եվ հաշվի առնելով այն փաստը, որ միավորումները, մասնավորապես՝ հասարակական կազմակերպությունները հատուկ դերակատարում ունեն ժողովրդավարության զարգացման համար, հնարավորինս պետք է պաշտպանված լինի նաև նրանց գործունեության ազատությունը»,- Ազգային ժողովում «Հասարակական կազմակերպությանների մասին» ՀՀ օրենսգրքում փոփոխությունների նախագծի քննարկման ժամանակ հայտարարեց «Լուսավոր Հայաստան» խմբակցության պատգամավոր Անի Սամսոնյանը։
Պատգամավորի խոսքերով՝ ակնհայտ է, որ գաղափարի և նպատակի շուրջ միավորված մարդկանց շահերը ոչ միշտ են համընկնում կառավարողների շահերի հետ, և ՀԿ-ները պետք է քաղաքական ազդեցություններից զերծ մնան։
Սակայն սա, ըստ ԼՀԿ պատգամավորի, չի նշանակում, որ ՀԿ-ները պետք է թափանցիկ և հաշվետու չլինեն, որը, սակայն, չպետք է խանգարի գործունեության ազատության էությանը, և չդառնա բեռ ՀԿ-ների համար։
«Եվ այդ գործիքը, օրինակ, վերապահենք Պետական եկամուտների կոմիտեին։ Համաձայն ԵԱՀԿ ԺՄԻԳ և Վենետիկի հանձնաժողովների «Միավորումների ազատության մասին» համատեղ ուղեցույցի՝ սահմանված է հետևյալը․ «Իրավաչափ է հաշվետվողականություն և թափանցիկություն պահանջել միավորումների ձեռք բերած միջոցների մասին, այդուհանդերձ նման պահանջը չպետք է անհարկի ծանր բեռ լինի։ Եվ պետք է լինի միավորման չափին և գործունեության շրջանակին համաչափ՝ հաշվի առնելով նրա գույքի և եկամուտների ծավալը»»,- շարունակեց Անի Սամսոնյանը։
Պատգամավորն ասաց, որ եթե այս օրինագիծը նախորդ իշխանությունների ժամանակ բերվեր, բոլորն ասելու էին, որ սա իրենից ճնշում է ենթադրում ՀԿ-ների վրա։
