ՄԻԱՎ-ի վերաբերյալ խորհրդատվությունն ու հետազոտությունն ամբողջ ծավալով իրականացվում է
Աջակցիր «Ա1+»-ինՁԻԱՀ-ի կանխարգելման հանրապետական կենտրոնի տնօրինությունը տեղեկացնում է, որ ամբողջ ծավալով իրականացվում են ՄԻԱՎ-ի վերաբերյալ խորհրդատվություն ու հետազոտությունը, մորից երեխային ՄԻԱՎ-ի փոխանցման կանխարգելումը, տրամադրվում է նախա- և հետկոնտակտային կանխարգելում։
«Դիսպանսեր հսկողության տակ գտնվող պացիենտներին հասանելի են բոլոր անհրաժեշտ լաբորատոր հետազոտությունները, ՀՌՎ դեղորայքը տրամադրվում է 2 ամիս և ավելի ժամկետով։ Կորոնավիրուսային հիվանդության (COVID-19) համաճարակի պայմաններում հորդորում ենք ՁԻԱՀ-ի ԿՀԿ-ի պացիենտներին և այցելուներին պահպանել անհատական պաշտպանության բոլոր կանոնները, վարակիչ հիվանդությունների նշանների` բարձր ջերմության, հազի, հարբուխի առկայության դեպքում չայցելել ՁԻԱՀ-ի ԿՀԿ։
Անհրաժեշտության դեպքում կապ հաստատե՛ք Ձեր բժշկի հետ, և մենք կկազմակերպենք դեղամիջոցների փոխանցումն ու արյան նմուշառումը։ Շնորհակալություն ենք հայտնում կենտրոնի բուժանձնակազմին, որ արտակարգ դրության պայմաններում ցուցաբերելով անձնական նախաձեռնություն և բարձր պրոֆեսիոնալիզմ՝ ամենօրյա ռեժիմով շարունակում են իրականացնել այցելուների ընդունելությունները և տրամադրում են որակյալ բուժօգնություն։
Կոչ ենք անում զերծ մնալ անպատասխանատու հայտարարություններից, պացիենտների շրջանում ապատեղեկատվություն տարածելուց, խուճապ սերմանելուց։ Զգուշացնում ենք, որ կենտրոնի բնականոն գործունեությունը խաթարելու, մեր պացիենտներին ապակողմնորոշելու հետագա քայրերին տրվելու է իրավական և բարոյական շատ խիստ գնահատական: Բոլոր հարցերի դեպքում խնդրում ենք զանգահարել 010 61-37-30 հեռախոսահամարին կամ գրել ՁԻԱՀ-ի ԿՀԿ-ի ֆեյսբուքյան էջին»,- հայտնում են կենտրոնից։
