Ինչու են աշխատանքից ազատվում Նորքի ինֆեկցիոնի աշխատակիցները․ նախարարության պարզաբանումը

Առողջապահության նախարարությունը պարզաբանում է ներկայացրել Նորքի ինֆեկցիոն հիվանդանոցի շուրջ ստեղծված իրավիճակի վերաբերյալ։

 Նախարարության հայտարարության մեջ ասվում է․

«Կառավարության 2021-2026 թվականների գործունեության միջոցառումների ծրագրով նախատեսվում է ՀՀ ԱՆ «Ինֆեկցիոն հիվանդությունների ազգային կենտրոնի» մասնաշենքերի հիմնանորոգում: Այս կարևոր ծրագրի արդյունքում, ի վերջո, կունենանք ժամանակակից չափորոշիչներին համապատասխան կենտրոն։

Փետրվարի 1-ից մեկնարկում են «Բ» մասնաշենքի վերակառուցման աշխատանքները և դրանով պայմանավորված` կենտրոնում ծավալվող բժշկական ծառայությունների մի մասը ժամանակավորապես կդադերցվի։

Բժշկական կենտրոնը դիտարկում է հաստիքացուցակի որոշ փոփոխություններ` բժշկական անձնակազմին անպայմանորեն այլ բժշկական հաստատություններում տեղավորելու հնարավորությունները»:

Նշենք, որ Նորքի ինֆեկցիոն հիվանդանոցի տասնյակ աշխատակիցներ այսօր բողոքի ակցիա են իրականացնում․ պատճառն այն է, որ նրանցից պահանջել են աշխատանքից ազատվելու դիմում գրել, որը պայմանավորել են շենքային  պայմանները բարելավելու աշխատանքներով։