Բանակում՝ խաղաղ պայմաններում մահացած զինվորների ծնողները տարիներ շարունակ պայքարում են, որ բացահայտվեն իրենց որդիների մահվան իրական հանգամանքները։ Այսօր այս առկախված հարցերի շուրջ մամուլի ասուլիսով հանդես եկան ՝ոչ մարտական պայմաններում մահացածներ Վալերի Մուրադյանի իրավահաջորդ Նանա Մուրադյանը, Տիգրան Օհանջանյանի իրավահաջորդ՝ Գոհար Սարգսյանը, Արթուր Ղազարյանի իրավահաջորդ՝ Նանա Մուրադյանը և իրավապաշտպանները ։

Հեղափոխությունից մի քանի ամիս անց որդեկորույս ծնողները հանդիպեցին ՀՀ վարչապետ Նիկոլ Փաշինյանի հետ և Կառավարության առաջին նիստի ժամանակ՝ մոտենալով ծնողներին խոստացավ՝ հարցին լուծում կտրվի։ 2020 թվականի օգոստոսի 3-ին որոշում ընդունվեց, համաձայն որի աշխատանքային խումբ ձևավորվեց՝ պետք է ուսումնասիրվեր ութ զինծառայողների մահվան հանգամանքները, դեպքերի առթիվ հարուցված գործերը։

Իրավապաշտպան, «Հելսինկյան ասոցիացիա» ՀԿ փաստաբան Արայիկ Պապիկյանը ներկայացրեց այս ընթացքում հանձնաժողովի կատարած աշխատանքը՝ նշելով, որ հանձնաժողովի քննած և ուսումնասիրած առաջին երեք գործերը ասուլիսին ներկա մայրերի որդիների սպանության գործերն են եղել։

«Ամիսներ անց կարող ենք արձանագրել, որ առարկայական ոչ մի արդյունք չունենք։ Բայց 10-15 տարվա գործերի ուսումնասիրության արդյունքում պարզ է դարձել, որ ունենք անդառնալի այնպիսի իրավիճակ, որ հնարավոր չէ օբյեկտիվորեն վեր հանել ենթադրյալ հանցանքը գործած անձանց կամ այնպիսի տվյալներ, որ հնարավորություն կտա այսօր ճշմարտության մասին հայտնել իրավահաջորդին»,- պարզաբանեց իրավապաշտպանը՝ նշելով, որ դա է նաև պատճառը, որ քննիչները չեն կարողանում առարկայական արդյունք ապահովել։

Ըստ իրավապաշտպանի՝ չեն պահպանվել նաև փաստաթղթային արխիվը, որովհետև՝ օրինակ զորամասի հաշվառման մատյանի պահպանման ժամկետը երկու տարի է։ Արայիկ Պապիկյանը սա աբսուրդ է համարում, որ 21-րդ դարում չի թվայնացվել այդ տվյալները։

Իրավապաշտպան Նինա Կարապետյանցն էլ նշեց,որ  իր համար թիվ մեկ խնդիրը՝ արդյոք պատահականություն է, որ չկան դեպքի վայրերը, արդյոք պատահականություն է, որ տարիներ շարունակ գործերը քննվել են տարբեր մարմիններում և ունեցել են վերահսկողություն իրականացնող դատախազներ և, որևէ դատախազ,  որևէ քննիչի չի ասել, որ բազմաթիվ ապացույցներ հավաքելու անհրաժեշտություն կա՝ ավելի լիարժեք այս գործը քննելու համար։

«Ինչով են զբաղված եղել այս բոլոր մարմինները»,-հարցնում է իրավապաշտպան Նինա Կարապետյանցը։

Որդեկորույս մայրերն էլ նշում են, որ մինչև վերջ պայքարելու են, որպեսզի արդարությունը հաղթի։ Մանրամասները՝տեսանյութում։