ԵԽ գլխավոր քարտուղարը կսպասի Ադրբեջանի պատասխանին անհանգստացնող վերջին դեպքերի առիթով (տեսանյութ)
Աջակցիր «Ա1+»-ինՀայաստանի պատվիրակության ղեկավար Ռուբեն Ռուբինյանն այսօր հարց ուղղեց Եվրոպայի խորհրդի գլխավոր քարտուղար Մարիա Պեյչինովիչ Բուրիչին,երբ վերջինս ԵԽԽՎ-ում պատասխանում էր պատվիրակների հարցերին:
«Դուք շատ լավ գիտեք, թե ինչ հետեւանքներ ունի Հայաստանի դեմ ադրբեջանական վերջին ագրեսիան։ Կա՞ն արդյունավետ գործիքներ և մեխանիզմներ, որոնք ամրագրված են կոնվենցիայով և կանոնադրությամբ, որպեսզի անդամ երկրներից պահանջեն լիովին կատարել իրենց ստանձնած պարտականությունները և պարտավորությունները: Ի՞նչն է խանգարում կազմակերպությանը նպատակաուղղված և արդյունավետ քայլեր ձեռնարկել զսպելու համար Ադրբեջանի ագրեսիվ պահվածքը , որը հանգեցնում է այն մարդկանց իրավունքների կոպիտ խախտումների և տառապանքների, ովքեր գտնվում են Մարդու իրավունքների եվրոպական կոնվենցիայի պաշտպանության ներքո»,- հարցրեց հայ պատվիրակը:
Գլխավոր քարտուղարը հայտնեց, թե հակամարտության սրման տարբեր փուլերում արել է հայտարարություններ. արձագանքել են ԵԽ մյուս մարմինները, ներառյալ ՄԻԵԴ -ը՝ առաջարկելով որպես միջանկյալ միջոց ռազմագերիների փոխանակումը:
Ըստ նրա ՝ Մարդու իրավունքների հանձնակատարը նաև հստակ առաջարկություններ է արել մարդու իրավունքների կոպիտ խախտումների վերաբերյալ, որոնք նա կիսում է
«Մարդասիրական քայլ պետք է արվի բոլոր գերիների հանդեպ: Ես ողջունում եմ, որ վերջերս տեղի ունեցան գերիների փոխանակումներ։ Ես կողջունեմ և կխրախուսեմ բարձր մակարդակի հանդիպումները »,- ասաց նա:
Գլխավոր քարտուղարը հայտնեց, որ իրեն անհանգստացնում են մարդու իրավունքների խախտումների մասին վերջին հաղորդումները, ներառյալ վատ վերաբերմունքի և արտադատական սպանությունների մասին պնդումները.
« Անշուշտ մեծ անհանգստության աղբյուր են և պետք է հետաքննվեն իրավասու մարմինների կողմից, ինչպես պահանջվում է Մարդու իրավունքների եվրոպական կոնվենցիայով»:
Քարտուղարի խոսքով՝ իրավունքի համաձայն մեղավորները պատասխանատվության պետք է ենթարկվեն։
«Տեսանյութի պատճառով, որն իմ ուշադրությանն է արժանացել, ես ադրբեջանական կողմին խնդրել եմ տեղեկություններ տրամադրել, թե ինչ են պատրաստվում անել վերջերս տեղի ունեցած մարդու իրավունքների կոպիտ խախտումների ենթադրյալ խախտումներին։ Եթե ես դրա պատասխանը չստանամ, կարծում եմ, այս խնդրի լուծման այլ տարբերակ կգտնվի:
Այս պահին ես իսկապես անհամբեր սպասում եմ ադրբեջանական կողմից մարդու իրավունքների այս ենթադրյալ կոպիտ խախտումների համար պատասխաններին»,- ասաց ԵԽ գլխավոր քարտուղարը:
Հիշեցնենք, որ հոկտեմբերի 10-ին Եվրոպայի խորհրդի գլխավոր քարտուղար Մարիա Պեյչինովիչ Բուրիչը նամակով դիմել է Ադրբեջանի արտաքին գործերի նախարար Ջեյհուն Բայրամովին:
Նա հստակ և մանրամասն տեղեկատվություն է հայցում Ադրբեջանի ԱԳՆ-ից Մարդու իրավունքների եվրոպական կոնվենցիայի 2-րդ և 3-րդ հոդվածների հնարավոր խախտումների վերաբերյալ՝ հիմնվելով հայ ռազմագերիների արտադատական սպանությունների տեսագրության փաստի վրա: