Բացել լրահոսը Փակել լրահոսը
A A
Տեսանյութեր Հարցազրույց Քաղաքականություն

Ադրբեջանն արդեն պետք է բացած լիներ ճանապարհը՝ համաձայն ՄԻԵԴ որոշման պահանջի․Արա Ղազարյան (տեսանյութ)

 Եվրադատարանը անուղղակիորեն որոշել է, որ Լաչինի ճանապարհը պետք է բացվի,- «Ա1+»-ի հետ զրույցում ասում է  միջազգային իրավունքի մասնագետ, փաստաբան Արա Ղազարյանը։

Երեկ  Եվրոպական դատարանը բավարարել էր Հայաստանի ներկայացրած պահանջը և պարտավորեցրել Ադրբեջանին ձեռնարկել բոլոր անհրաժեշտ և բավարար միջոցները՝ ապահովելու «Լաչինի միջանցքով» Հայաստանում բժշկական օգնություն ստանալու կարիք ունեցող ծանր հիվանդ անձանց տեղաշարժը, ինչպես նաև ճանապարհին անապաստան մնացած կամ ապրուստի միջոցների կարիք ունեցող անձանց անվտանգ տեղաշարժը:

  Ըստ Արա Ղազարյանի՝   դատարանը անդրադարձել է այն հարցերին, որոնք ներկայացվել են  Հայաստանի  դիմումում։  Իսկ դիմումը, նրա խոսքով, այլ կերպ չէր կարող ներկայացվել, քանի որ  այս  փուլում  պահանջը վերաբերում էր  ոչ թե խախտում ճանաչելուն , այլ հրատապ միջոց կիրառելուն։

 Փաստաբանը կարեւորում է հանգամանքը, որ ադրբեջանական կողմին չի հաջողվել մոլորեցնել, եւ ՄԻԵԴ որոշումը կոնկրետ հասցեագրված է Ադրբեջանին։

 Այսինքն՝ դատարանը հաստատել է, որ  ճանապարհը փակողների   հետեւում կանգնած է Ադրբեջան պետությունը։

 Ընդհանրապես, փաստաբանը հիշեցնում է․«Մարդու իրավունքների եվրոպական դատարանն ունի կայուն նախադեպային մոտեցում, որ ճանապարհը, հատկապես մայրուղիները փակել չի կարելի»։

Իսկ ե՞րբ պետք է Ադրբեջանը բացի Լաչինի միջանցքը գոնե ՄԻԵԴ որոշման մեջ նշված խավերի համար։

«Այսօր արդեն ճանապարհը  պետք է բացվեր, նույնիսկ երեկ՝ վճռի հրապարակումից հետո»,- ասաց Արա Ղազարյանը։

 Հիշեցնենք, որ դեկտեմբերի 12-ից մի խումբ ադրբեջանցիներ փակել են Արցախը  Հայաստանին կապող միակ ճանապարհը։

Մանրամասները՝  տեսանյութում