GRECO-ն նոր զեկույց է հրապարակել Հայաստանի վերաբերյալ․ 6 հանձնարարական մասամբ է կատարվել
Հայաստանը լրացուցիչ քայլեր է ձեռնարկել 2015 թվականին ներկայացված՝ խորհրդարանականների և դատական համակարգի կոռուպցիայի կանխարգելմանն ուղղված՝ դեռևս չկատարված հանձնարարականները իրականանություն դարձնելու ուղղությամբ: Այս մասին նշվում է Եվրոպայի խորհրդի հակակոռուպցիոն խմբի՝ GRECO-ի՝ այսօր հրապարակած զեկույցում։ ԳՐԵԿՈ-ի կողմից չորրորդ փուլի գնահատումը վերաբերում է «Պատգամավորների,դատավորների եւ դատախազների շրջանում կոռուպցիայի կանխարգելմանը»։
GRECO-ն հայտարարում է, որ 18 հանձնարարականներից 12-ը այժմ կատարվել են բավարար կերպով, իսկ 6-ը՝ մասամբ: Զեկույցը փակում է Հայաստանի մոնիտորինգի չորրորդ փուլը: Այս մասին Ա1+-ին հայտնում են ԵԽ մամուլի ծառայությունը։
Ըստ զեկույցի՝ պատգամավորների առնչությմամբ թերեւս նկատվում է որոշ առաջընթաց։ «Իշխանությունները դրական օրինակներ են նշել խորհրդարանական աշխատանքին հանրային ներգրավվածության պրակտիկայի վերաբերյալ: Նույն կերպ, միջոցներ են ձեռնարկվել պատգամավորների միջեւ շահերի բախումը կանխելու (օրինակ՝ առեւտրային կազմակերպություններում պատգամավորների բաժնեմասը հավատարմագրային կառավարման հանձնելու կարգավորումներ) եւ այս ռիսկային ոլորտում ավելի մեծ վերահսկողություն ապահովելու համար»,-եզրակացրել է կառույցը։
Վերանայվել են նաեւ նվերներին վերաբերող կանոնները։ Բայց դեռեւս պետք է ընդունվի վարքագծի կանոնագիրք, որը պետք է զուգակցվի վերահսկողության, խորհրդատվական եւ իրազեկվածության բարձրացման արդյունավետ միջոցառումներով:
«Դատական իշխանության վերաբերյալ հարկ է նշել, որ Արդարադատության նախարարը դեռեւս դերակատարություն ունի դատավորներին կարգապահական պատասխանատվության ենթարկելու ընթացակարգերում։ Այնուամենայնիվ, Դատական և իրավական բարեփոխումների 2022-2026 թվականների ռազմավարության գործողությունների ծրագրով նախատեսվում է դատավորների Ընդհանուր ժողովի Էթիկայի եւ կարգապահական հարցերի հանձնաժողովում ոչ դատավոր անդամների ձայների կշռի վերանայում»,- նշվում է զեկույցում։
Դատավորների հավաքագրման և առաջխաղացման որոշումների համար նախատեսվել են բողոքարկման մեխանիզմներ: Ազատման որոշումների համար Դատական օրենսգրքի փոփոխություններով ներդրվել են Բարձրագույն դատական խորհրդի որոշումների դեմ բողոքարկման մեխանիզմներ, որոնք դեռևս գործարկված չեն:
Չնայած այս զեկույցը, որը 2015 թվականի հանձնարարականների վերաբերյալ հինգերորդ գնահատումն է, փակում է մոնիտորինգի այս փուլը, ՀՀ իշխանությունները ցանկության դեպքում կարող են GRECO-ին տեղեկացնել չկատարված հանձնարարականների հետագա առաջընթացի մասին։
Դրանք վերաբերում են խորհրդարանականների վարքագծի կանոնագրքի ընդունմանը, նրանց էթիկայի և կանոնագրքի պահպանման մոնիտորինգի մեխանիզմի ամրապնդմանը, դատավորների հավաքագրման, առաջխաղացման և ազատման ընթացակարգերի բարեփոխմանը, դատավորների նկատմամբ կարգապահական վարույթների համակարգի վերանայմանը․ դատավորների գործունեությանն անարգել միջամտությունը հայտնաբերելուն և դրա համար պատշաճ կերպով պատժելուն, ինչպես նաև դատավորների վրա ոչ պատշաճ ազդեցությունները կանխարգելելու հետևողական քաղաքականություն վարելուն:
GRECO-ն կշարունակի դիտարկումներն արդեն հինգերորդ փուլում։
Ամբողջական զեկույցն՝ այստեղ
