Ինչ անի անկողնային թոշակառուն․ Վարչապետի հայտարարությունը թոշակառուների մոտ հարցեր է առաջացրել
Աջակցիր «Ա1+»-ին91 -ամյա Ռիմա տատի թոշակը արդեն մեկ տարի «Հայփոստի» աշխատակիցն է բերում։
Տեղաշարժման խնդիրներ ունեցող կնոջը հարազատները որոշել են՝ լրացուցիչ խնդիրներից խուսափելու համար ընտրել ավելի հեշտ տարբերակը՝ կանխիկը։ Մինչ այդ նա անկանխկիկ էր ստանում թոշակը:
Տատիկի հարազատը փոխանցեց, որ այնքան էլ հեշտ գործընթաց չէր անկանխիկից կանխիկի անցումը: Նախ տեղամասային բժիշկներն են եկել տուն եւ զննել: Այնուհետեւ տրամադրել տեղեկանք, որ ի վիճակի չէ տանից դուրս գալ: Բացի այդ նաեւ 3 հարեւանի ստագրություն է անհրաժեշտ եղել.
«Դա եւս հեշտ չեղավ: Բժիշկները գալիս են աշխատանքային ժամերին, իսկ այդ ժամին բոլորը աշխատանքի են: Մտածում էինք դա հաղթահարեցինք, այլեւս խնդիրների առաջ չենք կանգնի»,- ասաց հարազատը,որը չցանկացավ անունը հրապարակվի։
Նախորդ տարվա վերջին վարչապետ Նիկոլ Փաշինյանի հայտարարությունը, թե բոլոր նպաստները եւ թոշակները պետք է անկանխիկ վճարվեն, բազմաթիվ հարցեր եւ մտահոգություններ առաջացրել ինչպես Ռիմա տատի, այնպես էլ մյուս թոշակառուների մոտ:
Մի դեպքում թոշակառուին նախարարությունից հորդորել են սպասել մինչեւ փետրվարի մեկը, մյուս դեպքում ՝ զանգահարել եւ տեղեկացրել, որ տարեց թոշակառուն բանկ պետք է ընտրի, մինչդեռ նախարարությունն էլ տեղյակ չէ, բանկը տնայցի ծառայություն ունի, թե ոչ:
Ըստ պաշտոնական տվյալների, ներկայումս իրենց կենսաթոշակը կամ նպաստը կանխիկ եղանակով են ստանում կենսաթոշակառուների եւ նպաստառուների 10%-ից էլ պակաս քաղաքացիներ:
ՀՀ աշխատանքի և սոցիալական հարցերի նախարարի մամուլի քարտուղար Նվեր Կոստանյանն էլ «Ա1+»- ին հայտնեց, որ մինչեւ ապրիլի 1-ը կանխիկ տարբերակով թոշակի կամ նպաստի տրամադրումը կշարունակվի: Իսկ մինչ այդ մշակվում են ենթաօրենսդրական ակտեր՝ տիկին Ռիմայի վիճակում գտնվող թոշակառուների խնդիրները լուծելու համար:
