Ավագանին նախնական համաձայնություն կտա Կասկադի մշակութային կենտրոնի կառուցմանը

Երևանի ավագանու վաղվա նիստի օրակարգում ընդգրկված է «Կասկադ մշակութային հանգույց» նախագծի իրականացմանը նախնական համաձայնություն տալու հարցը: Ծրագիրն իրականացնելու է «ՋԻ ԹԻ ԲԻ ԴԻՎԵԼՈՓՄԵՆԹ» ՍՊԸ-ն (4 ընկերությունից բաղկացած կոնսորցիում), որը հաղթող էր ճանաչվել Կասկադ համալիրի վերակառուցման մրցույթում:

 Կասկադ համալիրի վերակառուցման մրցույթում հաղթող ճանաչված «Ջի Թի Բի դիվելոփմենթ» ՍՊԸ-ն 4 ընկերությունից բաղկացած կոնսորցիում է։  Ճարտարապետական նախագծի իրականացման համար 20 մլրդ 46 մլն դրամի ներդրում կարվի։ Ծրագիրը նախատեսում է «Կասկադ» համալիրի անավարտ հատվածի կառուցում՝ ապահովելով մշակութային կոթողի ամբողջական, ավարտուն տեսքը և համալիրի կապը Հաղթանակի 50-ամյակի հուշարձանի հետ:

Աշխատանքներն իրականացվելու են ֆրանսիացի ճարտարապետ Ժան- Միշել Վիլմոտի ներկայացրած էսքիզի և դրանից բխող նախագծի հիման վրա: Կստեղծվեն շուրջ 1000 հոգու համար նախատեսված համերգասրահ, ժամանակակից արվեստի նոր թանգարան, արվեստանոցներ, ժամանցի և հանգստի գոտիներ: Կառուցված բոլոր շինությունները, որոնք հագեցած են լինելու տեխնիկական անհրաժեշտ միջոցներով ու ենթակառուցվածքներով, ծրագրի ավարտին փոխանցվելու են
համայնքին՝ որպես համայնքային սեփականություն: