ՌԴ-ում չորս հայ է զոհվել
Պերմ-Եկատերինբուրգ մայրուղու 64-րդ կմ-ին ավտովթարի հետեւանքով զոհված ՀՀ քաղաքացիների անուններն արդեն հայտնի են:
Հունվարի 6-ին իրար էին բախվել «Hyundai Accent» եւ «ՎԱԶ-2110» մակնիշի ավտոմեքենաները:
«Արմենպրես»-ի հաղորդմամբ` ՌԴ-ում ՀՀ դեսպանության ճշտած տվյալներով` «ՎԱԶ-2110» մակնիշի ավտոմեքենայի մեջ եղած ՀՀ հինգ քաղաքացիներից 4-ը՝ Մկրտչյան Դավիթ Նորայրի (ծնված՝ 1977թ.), Արեւշատյան Աշխեն Մայիսի (ծնված՝ 1991թ.), Արեւշատյան Սուսաննա Կարենի (ծնված՝ 1958թ.) եւ Արեւշատյան Մայիս Լյուդվիգի (ծնված՝ 1954), տեղում մահացել են: Ուղեւորներից Լիանա Մայիսի Արեւշատյանը (ծնված՝ 1978թ.) տարբեր կարգի կոտրվածքներով տեղափոխվել է Կունգուր քաղաքի հիվանդանոց:
Ռուսաստանի Ներքին գործերի նախարարության գլխավոր վարչության Պերմի մարզի ճանապարհային ոստիկանությունից տեղեկացրել են, որ ավտովթարի մեղավորը եղել է «Hyundai»-ի վարորդը, ով եւս տեղում մահացել է: Մայրուղու վրա նա փորձել է շրջանցել «ՄԱԶ» մեծ բեռնատարը, արդյունքում հայտնվել է հանդիպակած գոտում եւ ճակատային մասով հարվածել «ՎԱԶ 2110»-ին:
