Պահանջվում են հաղթանակներ
Հայաստանի չորս շախմատիստները շարունակում են պայքարել Եվրոպայի չեմպիոնի կոչման համար:
Լեհական Լեգնիցայում ընթացող առաջնության 7 տուրից հետո մեր գրոսմայստերներ Սերգեյ Մովսեսյանը, Գաբրիել Սարգսյանը, Տիգրան Լ. Պետրոսյանը եւ Հրանտ Մելքումյանը վաստակել են 5-ական միավոր եւ բաժանում են 9-43-րդ տեղը:
Նրանք, ճիշտ է, 1 միավորով ետ են մնում մրցաշարի առաջատար Ալեքսանդր Մոիսեենկոյից, սակայն հաջող խաղալու դեպքում կարող են անգամ դառնալ չեմպիոն կամ մրցանակակիր:
Դրա համար նրանք միանշանակ պետք է հաղթեն մնացած երկու տուրերում: Այսօր Սերգեյ Մովսեսյանը կմրցի Ֆրանսիան ներկայացնող Վլադիսլավ Տկաչեւի հետ: Գաբրիել Սարգսյանին մրցակից է բաժին ընկել ադրբեջանցի Գադիր Գուսեյնովը: Տիգրան Լ. Պետրոսյանը կհանդիպի ռուսաստանցի Իվան Պոպովի, իսկ Հրանտ Մելքումյանը` ավստրիացի Մարկուս Ռագերի հետ:
Հիշեցնենք, որ Եվրոպայի առաջնությունում 1-23-րդ տեղերը գրաված շախմատիստները իրավունք կստանան մասնակցելու այս տարվա շախմատի աշխարհի գավաթի խաղարկությանը:
