«Շիրակը» չի կարողանում հավաքել լրիվ կազմը
Հայաստանի չեմպիոն Գյումրիի «Շիրակը» այս օրերին ուսումնամարզական հավաք է անցկացնում Հանքավանում:
Թիմի գլխավոր մարզիչ Վարդան Բիչախչյանին դեռեւս չի հաջողվում հավաքել բոլոր ֆուտբոլիստներին: Նախ, դարպասապահ Արթուր Հարությունյանը մասնակցում է Հայաստանի հավաքականի ուսհավաքին եւ իր թիմակիցներին կմիանա Դանիա - Հայաստան խաղից հետո: Կարեն Մուրադյանը, Դավիթ Հակոբյանը, Դավիթ Մարիկյանը նույնպես նոր են մեկնել Հանքավան, քանի որ նրանք մինչ այդ հրավիրվել էին Հայաստանի երիտասարդական հավաքական:
Այդ իսկ պատճառով Վարդան Բիչախչյանը առաջին ուսհավաքին ընդգրկել է «Շիրակ-2» թիմի մի քանի խաղացողների: Ինչ վերաբերում է լեգեոնականներին, ապա նրանցից միայն Սամուել Կյերեն է առաջինը միացել թիմին, իսկ մյուսները աստիճանաբար են վերադառնում իրենց երկրներից:
«Շիրակում» այժմ մարզվում է սենեգալցի 20-ամյա պաշտպան Վադե Շեյխը, որը հանդես է գալիս տեղի «Պիկինե» թիմում: Թիմ է վերադարձել նաեւ կոտդիվուարցի հարձակվող Ֆոֆանա Բեկոն, որը այս տարվա սկզբից վարձավճարով հանդես էր գալիս Իրանի «Զոբ Ահան» ակումբում:
Նշենք, որ «Շիրակը» հունիսի 11-ից ուսհավաքը կշարունակի Ավանի ֆուտբոլի ակադեմիայում, իսկ ամսի 16-ին կմեկնի Թբիլիսի, որտեղ մեկ օր անց ընկերական խաղում կմրցի տեղի «Դինամոյի» հետ:
