Քավոր-սանիկի վեճը հասել է դատարան (տեսանյութ)
Ծաղկաձորի «Արքա» ռեստորանային համալիրը թշնամացրել է քավոր-սանիկի։ Օնիկ Բաղդասարյանի ու Գնել Հայրապետյանի վեճը հասել է դատարան։ «Օնիկ Բաղդասարյանը կառուցել է այդ ամեն ինչը, որից երեք տարի հետո պարզվել է, որ այդ հողատարածքը, որտեղ ինքը կառուցել է եւ որտեղ Գնել Հայրապետյանը աշխատել է, սեփականաշնորհվել է»,- «Ա1+»-ին ասաց Օնիկ Բաղդասարյանի ներկայացուցիչ, փաստաբան Աշոտ Սարգսյանը։ Օնիկ Բաղդասարյանը հայց է ներկայացրել՝ պահանջելով չեղյալ համարել Ծաղկաձորի քաղաքապետարանի որոշումը՝ «Արքա» ռեստորանի տարածքը աճուրդով Գնել Հայրապետյանին վաճառելու վերաբերյալ։ Առաջին ատյանը բավարարել է բողոքը, գործը հասել է վերաքննիչ։ Աշոտ Սարգսյանի խոսքերով՝ դատարանում նույնիսկ շինարարներն են փաստել, որ շինությունը Օնիկ Բաղդասարյանն է կառուցել. «Թող Գնել Հայրապետյանը ինքը բերեր վկաներ, ասեր ոչ նրանք չեն կառուցել , սրանք են կառուցել»: Իսկ Գնել Հայրապետյանի ներկայացուցիչ Վարդան Առաքելյանն ավելացնում է. «Կարող է Հայաստանում ցանկացած գործատուի մոտ աշխատող աշխատակիցը գործատուի շահերից չբխող ցուցմունք տալ»: Նրա խոսքերով՝ դատարանը նույնիսկ փորձագետի չի հարցաքննել՝ պարզելու, թե երբ է կառուցվել շինությունը: Վարչական վերաքննիչ դատարանը այս գործով որոշումը կհրապարակի հուլիսի 7-ին: Մանրամասները՝ տեսանյութում
