Կալանավորը չի կարողանում գալ դատարան (տեսանյութ)
Դատարանն այսօր չփոխեց ինքնուրույն քայլել եւ սնվել չկարողացող կալանավոր Աշոտ Սարգսյանի խափանման միջոցը՝ կալանքը: Արարատի եւ Վայոց ձորի մարզերի ընդհանուր իրավասության դատարանի դատավոր Լեւոն Արազյանը մերժեց պաշտպանի միջնորդությունը։ «Այսօր դեռ աստծո կամոք, ընտանիքի անդամների կողմից ամենօրյա բժշկական միջամտության, դեղահաբերի , թթվածին մատակարարելու ամբողջ ծախսերը դրված է ընտանիքի անդամների վրա»,- դատարանում այսօր հայտարարեց պաշտպան Արթուր Սարգսյանը: Առողջապահության նախարարության միջգերատեսչական փորձագիտական հանձնաժողովի եզրակացության համաձայն Աշոտ Սարգսյանը իր բուժումը պետք է ստանա նեղ մասնագիտացված բուժհաստատություններում, չի կարող մասնակցել դատական նիստերին, ինչպես նաեւ ճանաչվել է 1-ին կարգի անժամկետ հաշմանդամ: Գործով մեղադրողը եւս տեղյակ էր նրա առողջական վիճակից, նույնիսկ առողջություն մաղթեց Աշոտ Սարգսյանին, բայց առարկեց միջնորդության դեմ: Իսկ 51- ամյա Աշոտ Սարգսյանը մեղադրվում է ԶՈՒ օպերատիվ կառավարման և իրավիճակների վերահսկման կենտրոնի տեսակոնֆերանս համակարգի ստեղծման համար Պաշտպանության նախարարությունից առանձնապես խոշոր չափերի գումար հափշտակելու մեջ: Նա չի ընդունում մեղադրանքը։ Պաշտպանը համոզված է, որ գործի հետ կապ ունի Քննչական կոմիտեի ղեկավար կազմը եւ միայն բարձրագույն իշխանության ցուցումով փոփոխություն կլինի այս գործում: Դատարանի՝ խափանման միջոցը չփոխելու որոշումը կբողոքարկվի Վերաքննիչ դատարանում, իսկ գործով դատական նիստը կշարունակվի հուլիսի 8-ին՝ կրկին առանց Աշոտ Սարգսյանի: Գործն արդեն 8 ամիս է դատարանում է, սակայն նիստերը, որպես այդպիսին ՝չեն կայանում:
