Հայաստանը փնտրում է այլընտրանք Լարսին
Հայաստանի 144 քաղաքացիներ, 8 օր Վերին Լարսի անցակետում մնալուց հետո, տեղափոխվել են Հայաստան; Երեկ՝ հունիսի 29-ի գիշերը, Ռուսաստանից ժամանել է 3 ինքնաթիռ: Զվարթնոց օդանավակայանում ուղևորներին դիմավորել են ԱԻն աշխատակիցները, բժիշկներն ու հոգեբանները: Հայկական կողմը զբաղվում է նաեւ անցակետում մնացած բեռնատարների տեղափոխման հարցով: 72 բեռնատար արդեն Նովոռոսիյսկում են՝ բեռնաթափվում են: Եւս մի քանի տասնյակ բեռնատար՝ նավահանգիստներում սպասում են իրենց հերթին: Հետագա կուտակումներից խուսափելու համար, կառավարությունը խնդրում է բեռնափոխադրող ընկերություններին ամեն ինչ պլանավորեն և նախապես լաստանավում տեղ զբաղեցնեն: Նախնական տվյալներով ավտոճանապարհը կվերականգնվի 2-3 շաբաթում: Բայց մինչեւ այդ, հայկական կողմն արդեն բանակցում է Ռուսաստանի ու Վրաստանի հետ՝ այլընտրանքային ճանապարհ ունենալու համար: «Հարավային Օսեթիայի կողմում հնարավորություն կա, ճանապարհը լավ վիճակում է, հիմա գնում են խոսակցություններ, բանակցություններ, կարծում եմ, գոնե ժամանակավոր՝ կբացենք այդ ճանապարհը»,- նշում է տրանսպորտի եւ կապի նախարար Գագիկ Բեգլարյանը: Ի դեպ, Հայաստանի քաղաքացիներին հայրենիք վերադարձնելու համար նախատեսվում է կատարել եւս մեկ չվերթ: Այն ամենայն հավանականությամբ Երեւանում վայրեջք կկատարի այսօր երեկոյան: Լուսանկարը՝ Aliq Media
