«Սասնա ծռեր» խմբին սնունդ հասցրած Արթուր Սարգսյանի մեղադրանքը փոխվել է
«Եթե սա քաղաքական հրահանգ չլիներ, ապա դատարանի ներկայացրած կալանքի միջնորդությունը անհիմն կհամարվեր»
«Սասնա ծռեր» խմբի անդամներին սնունդ հասցրած Արթուր Սարգսյանին առաջադրված մեղադրանքը փոխվել է:
«Նախկինում Արթուր Սարգսյանը մեղադրվում էր ՀՀ Քրեական օրենսգրքի 218-րդ և 235-րդ հոդվածներով , իսկ հիմա նա մեղադրվում է այդ հոդվածներով նախատեսված հանցանքներին օժանդակելու համար, այսինքն ոչ թե այդ հանցանքները կատարող այլ օժանդակող»,-«Ա1+»-ի հետ զրույցում տեղեկացրեց Արթուր Սարգսյանի փաստաբան Տիգրան Եգորյանը:
Վերջինիս փոխանցմամբ՝ այդ հոդվածներով նախատեսված պատժամիջոցների չափը՝ 8-15 տարի է, պարզապես դատարանը գնահատում է պատժի խստության համաչափությունը, թե ում ինչքան պատիժ պետք է նշանակվի:
«Բնականաբար, կատարողին ու կազմակերպիչներին ավելի խիստ պատիժ է նշանակվում, քան օժանդակողին»,-նշեց փաստաբանն ու հավելեց.
«Նրան սկզբում հուլիսի 17-ին ՊՊԾ գունդը գրաված անձ էին դիտարկել, սակայն նա այդ ժամանակ գունդ չի մտել: Նա ամսի 26-ին է սնունդ տարել «Սասնա ծռեր»-ի անդամներին:
Այսինքն սա անփույթ, առանց նորմալ փաստերը քննարկելու, ուղղակի շաբլոնային մեղադրանքներ էին առաջադրել և արդյունքում ստացվել էր, որ գնդի տարածք ամսի 26-ին մտած անձը ամսի 17-ին ՊՊԾ գունդն է գրավել:
Սա վկայում է այն մասին, որ ոչ թե գործի քննության արդյունքում է մեղադրանքներն առաջադրվել, կալանքի որոշումը կազմվցել, այլ պարզապես հրահանգի»:
Ընդհանուր առմամբ՝ ստեղծված իրավիճակը Տիգրան Եգորյանը գնահատեց այսպես.
«Այսօր մենք առերեսվում ենք վրեժխնդրության, հաշվեհարդարի և արդար դատաքննության հետ ոչ մի աղերս չունեցող մի գործընթացի հետ, որի նպատակը մեկն է՝ պատժել բոլոր նրանց, ով հանդգնել է այդպիսի արարք անել և դրանով իսկ լավ դաս տալ բոլոր նրանց, ովքեր հնարավոր է վաղը հանկարծ ցույցերի կամ նման բաների միջոցով ընդդիմանան իշխանությանը:
Սա դասական բռնապետական երկրներին բնորոշ գործողություններ են և արդար դատաքննության հետ ոչ մի կապ չունեն»:
Արթուր Սարգսյանը 2-րդ կարգի հաշմանդամ է, ողնաշարի վիրահատությունների է ենթարկվել և տեղաշարժման լուրջ խնդիրներ ունի: Փաստաբանը համոզված է, որ քաղաքական կամք լինելու դեպքում՝ այս առողջական խնդիրները բավարար են, որպեսզի Արթուր Սարգսյանի խափանման միջոց կալանքը փոխարինվեր գրավով:
«Եթե սա քաղաքական հրահանգ չլիներ, ապա դատարանի ներկայացրած կալանքի միջնորդությունը անհիմն կհամարվեր»-եզրափակեց Տիգրան Եգորյանը:
