Հայտնի է կալանավորված դատավորի գործով նիստի օրը
Կաշառք վերցնելու կասկածանքով կալանավորված Շենգավիթ վարչական շրջանի ընդհանուր իրավասության դատարանի դատավորի գործով առաջին դատական նիստը տեղի կունենա դեկտեմբերի 15-ին: Այս մասին տեղեկանում ենք «Դատալեքս» տեղեկատվական համակարգից: Հիշեցնենք, որ իր վարույթում քննվող քաղաքացիական գործով կողմի օգտին իր լիազորությունների շրջանակում գործողություններ կատարելու համար, դատավոր Իշխան Բարսեղյանը, փաստաբան Էլզա Զաքարյանի միջոցով, պահանջել եւ 2016 թվականի հոկտեմբերի 27-ի հետիոտնային գետնանցումներից մեկում անձամբ ստացել է 1000 ԱՄՆ դոլար կաշառք: Այս գործով մեղադրանք է առաջադրվել նաեւ փաստաբան էլզա Զաքարյանին: Սակայն նրա նկատմամբ որպես խափանման միջոց է ընտրվել քաղաքից չբացակայելու մասին ստորագրությունը: Դատական նիստը կայանալու է Շենգավիթի դատարանում: Նրան դատելու է Կարեն Մարդանյանը, ով այս տարվա հունիսի 16-ին է նշանակվել Շենգավիթ վարչական շրջանի ընդհանուր իրավասության առաջին ատյանի դատարանի դատավոր:
