Ժիրայր Սեֆիլյանի բողոքը մերժվեց (տեսանյութ)
«Ազատություն Ժիրայր Սեֆիլյանին: Ազատություն, ազատություն»,- այս վանկարկումներն այսօր լսվում էր Վերաքննիչ քրեական դատարանի դիմաց: Հիմնադիր խորհրդարանի անդամները պահանջում են ազատ արձակել իրենց առաջնորդ Ժիրայր Սեֆիլյանին: Դատարանում տեղի էր ունենում նրա կալանքի ժամկետը երկարացնելու դեմ բողոքի քննությունը: Վերաքննիչ դատարանը, սակայն, անփոփոխ թողեց առաջին ատյանի դատարանի որոշումը: Հունիսի 20-ից կալանավորված Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ շենք-շինություններ՝ այդ թվում Երեւանի հեռուստաաշտարակը զավթելու, ինչպես նաեւ ապօրինի կերպով զենք, ռազմամթերք ձեռք բերելու, փոխադրելու եւ պահելու մեջ: « Ժիրայր Սեֆիլյանը ողջ մեղադրանքը համարում է թատերական ներկայացում , բեմադրություն եւ չի ուզում դեր ունենալ այս բեմադրության մեջ: Ընդգծված որեւէ քննչական գործողության չի մասնակցում»,- դատական նիստից հետո ասաց պաշտպան Տիգրան Հայրապետյանը: Պաշտպանի խոսքերով՝ առաջին ատյանի դատարանում, երբ կայացվել է դատական ակտը, ոչ Ժիրայր Սեֆիլյանը, ոչ նրա պաշտպանները ներկա չեն եղել: Ավելին միջնորդությունները քննչական մարմինը չի տրամադրում Ժիրայր Սեֆիլյանին ծանոթանալու համար, թեեւ պարտավոր է. «Ժիրայր Սեֆիլյանի դեմ կայացված ակտը, ոչ թե դատարանի որոշում է իրավական հիմնավորումներով, այլ քաղաքական որոշում է՝ նրա գործունեությունը սահմանափակելու վերաբերյալ»: Ժիրայր Սեֆիլյանին վերջերս տեղափոխել են «Արմավիր» ՔՀԿ, որտեղ խցում նա մենակ է։ « Ըստ էության հիմա մեկուսացված է»,- ավելացրեց պաշտպան Տիգրան Հայրապետյանը: Դատարանի այսօրվա որոշումը կբողոքարկվի Վճռաբեկ դատարան:
