Սեֆիլյանի գործով կալանավորվածը հացադուլ եւ ջրադուլ է սկսել
«100 ամյակն առանց ռեժիմ»-ի շարժման առաջնորդ Ժիրայր Սեֆիլյանի գործով կալանավորված Ներսես Պողոսյանն այսօրվանից հացադուլ եւ ջրադուլ է սկսել: Նման ծայրահեղ քայլի դիմելու պատճառն այն է եղել, որ այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը եւս երկու ամսով երկարացրել է նրա կալանքի ժամկետը: Ներսես Պողոսյանը հայտարարել է նաեւ, որ հրաժարվում է բժշկական որեւէ օգնությունից: Դատարանը հաշվի չի առել 500 անձանց՝ այդ թվում հայտնի արվեստագետների, երաժիշտների, պատմաբանների անձնական երաշխավորագրերը: Ներսես Պողոսյանը մինչ այս մոտ մեկ ամիս հացադուլ էր հայտարարել՝ պահանջելով փոխել իր խափանման միջոցը՝ կիրառելով ստորագրություն կամ գրավ: Հացադուլն արդյունք չտվեց, փոխարենը առողջական խնդիրներ առաջ եկան: Արդեն 8 ամիս կալանավայրում գտնվող Ներսես Պողոսյանը մեղադրվում է կազմակերպված խմբում լինելու համար:
