Իտալիայի դեսպանը սիրում է Երեւանում «նոր տեղեր հայտնաբերել» (տեսանյութ)
Իտալական համը պարտադիր է Իտալիայի ազգային տոնին
Հայաստանում իր երկրի ազգային տոնը նշող իտալացի երիտասարդն առաջինը մոտենում է մակարոնի սկուտեղին։ Համը հավանելով՝ իր հայ ընկերներին խորհուրդ է տալիս անպայման փորձել։ Իտալական խոհանոցն այնպես է «սեփականաշնորհվել» հայաստանցիների կողմից, որ այդ երկրի ազգային տոնի՝ Հանրապետության օրվա առիթով ընդունելությանը ներկայացված ուտեստների մեծ մասը թվում էին շատ հարազատ ու տնական։
Հայաստանում Իտալիայի արտակարգ եւ լիազոր Ջովանի Ռիչուլիին ուրախ է,ո ր Երեւանում կարելի է ճաշակել իտալական ուտեստներ։ Իսկ որտե՞ղ է ճաշում ինքը. «Ես սիրում եմ նոր տեղեր հայտնաբերել»,- պատասխանում է դեսպանը, որն արդեն 4 տարի է պաշտոնապես ներկայացնում է Իտալիան մեր երկրում։
«Կոնգրես» հյուրանոցի բակում կազմակերպված ընդունելությանը դեսպանը փորձում է բարեւել եւ զրույցի բռնվել իր բոլոր հյուրերի հետ։ Որեւէ մեկի հետ երկար զրուցել չի հաջողվում. անմիջապես մոտենում է մեկ ուրիշը՝ շնորհավորանքները փոխանցելու. 71 տարի առաջ՝ 1946-ի հունիսի 2-ի հանրաքվեով Իտալիան հռչակվել է հանրապետություն։
Ընդունելության հրավերը ընդունել էին պատգամավորներ, քաղաքական գործիչներ, քաղաքագետներ, դասախոսներ, դիվանագիտական տարբեր կորպուսների ներկայացուցիչներ ( էդմոն Մարուքյան, Դավիթ Շահնազարյան, Րաֆֆի Հովհաննիսյան, Ստեփան Գրիգորյան, Ալեքսանդր Իսկանդարյան եւ այլք):
Հայաստանի Հանրապետության եւ Իտալիայի Հանրապետության միջեւ դիվանագիտական հարաբերությունները հաստատվել են 1992թ. մարտի 17-ին:
Ազգային տոնի եւ դիվանագիտական հարաբերությունների հաստատման 25-ամյակի առիթով այսօր ուղերձ է հղել Իտալիայի արտաքին գործերի եւ միջազգային համագործակցության նախարար Անջելինո Ալֆանոն. «Այս տարեդարձը հաստատում է մինչ այժմ իրականացված աշխատանքի հաջողությունը եւ խթան է հանդիսանում գալիք տարիներին էլ ավելի ամրապնդելու համար»։
« Համոզված եմ, որ ՄԱԿ Անվտանգության խորհրդին Իտալիայի մասնակցությունը, ինչպես նաեւ ԵԱՀԿ նախագահությունը, որն իմ երկիրն ստանձնելու է 2018թ-ին, նպաստավոր շրջանակ կհադիսանան մայրցամաքում խաղաղությանը սպառնացող մարտահրավերներին արդյունավետ եւ տեւական լուծումներ գտնելու ուղղությամբ փոխգործակցության համար»,- ընդգծել է նախարար Անջելինո Ալֆանոն։
