Արտավանցի երեխաները էկոփառատոնին՝ տատիկների գաթաներով (տեսանյութ)
«Երիտասարդ կենսաբանների ասոցիացիա» և «Ջերմուկի զարգացման կենտրոն» հասարակական կազմակերպություններն արդեն երկրորդ անգամ Հայաստանում կազմակերպել էին Էկոտուրիզմի փառատոն՝ Վայոց ձոր մարզի Արտավան գյուղում:
Փառատոնի նպատակն է նպաստել էկոզբոսաշրջության զարգացմանը Հայաստանում, ինչպես նաև բարձրացնել կենսաբազմազանության պահպանության վերաբերյալ հանրային իրազեկվածության մակարդակը:
Արտավանցիները փառատոնին ներկայացել էին իրենց ողջ հմայքով ու կարողություններով՝ մեծից փոքր։
Այս երեխաները բերել իրենց տատիկի պատրաստած փոքրիկ գաթաները. արևից չեն նեղվում, անպայման ուզում են գոնե մի քանիսը վաճառել
Դավիթը սովորում է քոլեջում, ապրում է Երևանի հանրակացարաններից մեկում, ձյուդոիստ է, փառատոնը լավ առիթ է՝ ընտանիքին օգնելու համար. բանանի, ելակի ու ծիրանի խառնուրդից անմահական հյութ է ստանում
Հորած պանիր, կարկանդակներ, ախորժելի թթու
Տիկին Տաթեւը ներկայացնում է Վայոց ձորի հին ճաշատեսակները՝ ճմուռ, որը կմատուցի ձվածեղով ու թթվով, ինչպես նաև՝ սպիտակ բանջարով ապուր ու Կարշըն, որը պատրաստվում է ընկույզով
Աղջիկները վաճառում են խաշած եգիպտացորեն, տարբեր կարկանդակներ, որ թխել են իրենց ձեռքով, նախապես խնդրում են հյուրասիրվել
Փառատոնն ուղեկցվում է ազգագրական պարերով. ով չգիտի, անպայման սովորում է
Երիտասարդների մի խումբ պատրաստվում է վրաններում գիշերել, հաջորդ օրը նրանց բազմազան խաղեր են սպասվում, այդ թվում՝ գանձերի որոնում։
Արտավանը հեքիաթային լճեր ունի՝ Հայելու գյոլ կամ Կարմիր լիճ. ահա այսպիսի անվանում ունի այս կանաչ լիճը, որի բուսածածկույթը աշխարհի քարտեզ է ներկայացնում՝ ամենայն մանրամասներով։ Ասես մարդու ձեռքով նկարված լինի. Հյուսիսային և Հարավային Ամերիկա, Աֆրիկա, Եվրոպա...
Լրագրողների այցը փառատոն ապահովել էր Բնության համաշխարհային հիմնադրամի հայաստանյան մասնաճյուղը (WWF-Հայաստան), որը էկոմիջանցքի ստեղծման ու պահպանման ակունքներում է։ Արտավանը նույնպես մտնում է այդ միջանցքի մեջ՝ իր հարուստ կենսաբազմազանությամբ։ Տարածքը սկիզբ է առնում «Խոսրովի անտառ» արգելոցից և ավարտվում Զանգեզուր արգելավայրի սահմանագծում: Ահա քարտեզը
Հասմիկ Բուդաղյան
Ավելին՝ տեսանյութով
