Եվրոպական ՀԿ-ները՝ հանուն Արցախի. ստորագրահավաքը մեկնարկել է
Հայկական բարեգործական ընդհանուր միությունը կոչ է անում Եվրամիությանը և եվրոպական մարդասիրական կազմակերպություններին ներգրավվել Արցախի ժողովրդի կյանքում։ Այս նպատակով նրանք սկսել են արշավ- ստորագրահավաք:
Հունիսի 7- ին մեկնարկած ակցիան այս պահին ունի 2000 ստորագրություն: Ակցիային մասնակցել է 60 հասարակական-քաղաքական դեմք, այդ թվում՝ Եվրախորհրդարանի պատգամավորներ:
Այս թիվը, սակայն, դեռ շատ քիչ է, կարծում է Բելգիայի հայկական կազմակերպությունների ֆեդերացիայի ընդհանուր համակարգող Շահնուր Մինասյանը:
Ստորագրությունները վերջում կներկայացվեն եվրոպական տարբեր կազմակերպություններ՝ աջակցություն ստանալու նպատակով. «Արցախում այսօր Եվրոպայի ներգրավվածությունը համարյա հավասար է զրոյի: Մեր այս նախաձեռնության նպատակը եվրոպական ՀԿ-ների ներգրավումն է Արցախում, փոխգործակցությունն արցախյան ՀԿ-ների հետ: Ուզում ենք հասկանալ՝ ինչ կարող ենք անել՝ թեկուզ փոխայցելությունների և տեղեկատվության փոխանակման առումով: Ենթադրվում է նաև ֆինանսական աջակցություն, սակայն նպատակն ամենեւին դա չէ»,- նշում է Շահնուր Մինասյանը:
Պարոն Մինասյանը հիշեցնում է, որ կան չճանաչված հանրապետություններին աջակցություն ցուցաբերող համապատասխան եվրոպական հիմնադրամներ, որոնք օգնություն են ցուցաբերում Հյուսիսային Կիպրոսին, Աբխազիային, Մերձդնեստրին և այլ չճանաչված հանրապետությունների, մինչդեռ Արցախ նման կառույցներից զրո դրամ է մուտք գործում:
Արցախում Եվրոպայի ներգրավվածությունը կարևոր է նախևառաջ քաղաքակրթական պատճառներով, և ամենևին արդար չէ, որ Եվրոպայի մաս կազմող Արցախը դուրս մնա եվրոպական ինստիտուտների ուշադրությունից. կարծում է Արցախի մարդու իրավունքների պաշտպան Ռուբեն Մելիքյանը: Նա կարեւորում է հատկապես եվրոպական իրավապաշտպան հանրության ներգրավվածությունն Արցախում, ինչը կբարձրացնի ինչպես ներքին կյանքում մարդու իրավունքների պաշտպանվածության մակարդակը, այնպես էլ դրական ազդեցություն կունենա խաղաղության պահպանման տեսանկյունից:
Ստորագրահավաք-արշավի արդյունքները կամփոփվեն աշնանը, սակայն այն շարունակական բնույթ կկրի: Նախատեսվում է Ացախին օգնելու թեմայի շրջանակներում կոնֆերանս կազմակերպել Եվրախորհրդարանում:
