Եթե շոկոլադը ձեռքի մեջ չի հալվում, ուրեմն իսկական շոկոլադ չէ
Բարձրորակ շոկոլադ գտնելն այս օրերին շատ դժվար է՝ կակաոյի քերուկի փոխարեն օգտագործվում է փոշի: Կակաոյի բարձրարժեք յուղը փոխարինվում է շատ ավելի ցածրորակ եւ էժան բուսայուղերով նաև արմավենու յուղով: Պարենային իրավունքի փորձագետ Դավիթ Պիպոյանի խոսքերով՝ իրական շոկոլադե սալիկը տարբերելու համար այն ոչ թե պետք է այրել, ինչպես վերջին օրերին տարածվել էր համացանցում, այլ հալեցնել: «Քանի որ կակաոյի յուղն ունի շատ ցածր հալման ջերմաստիճան՝ 30 աստիճան: Իսկ բուսայուղերը, արմավենու յուղը՝ 40 աստիճան: Շոկոլադե սալիկն ուղղակի պետք է պահել ձեռքի ափի մեջ: Եթե այն արագ հալվում է եւ կպնում է ձեր մատերին, ապա գործ ունենք կակաոյի յուղի հետ, իսկ եթե ձեռքի մեջ պահելուց հետո այն չի այրվում, բնականաբար դա նշանակում է, որ պարունակում է ոչ թե կակաոյի յուղ, այլ արմավենու»,- ասում է Դավիթ Պիպոյանը: Նրա խոսքերով՝ բարձրորակ շոկոլադը պետք է քերուկից բաղկացած լինի: Նա խորհուրդ է տալիս մեկ կտոր շոկոլադ կոտրել, գցել կաթի մեջ: Բարձրորակ սալիկը պետք է անմիջապես սուզվի եւ նստի հատակին, իսկ ցածրորակը՝ կարող է լողալ: Ստուգման մյուս տարբերակը շոկոլադը սառցախցիկում տեղադրելն է: Եթե այն կակաոյի յուղով է , պետք է սպիտակի, իսկ եթե բուսայուղով է գույնը մնում է անփոփոխ: Այսօր Դավիթ Պիպոյանն անդրադարձավ նաեւ մեկ այլ խնդրի՝ Ադրբեջանում 130 թուրքական ապրանքանի ճանաչվել է մարդու առողջության համար վնասակար: Պարենային իրավունքի փորձագետի խոսքերով՝ այդ շարքում են շոկոլադը, բուսական յուղերը, թեյերը, ոչ ալկոհոլային արտադրանքը, ինչպես նաեւ սննդային հավելումները: Նա համոզված է՝ մենք կարծես չունենք թուրքաֆոբիա, չենք վախենում նաեւ թուրքական սննդամթերքից: Մեր երկրում շրջանառվում են կիտրոնները, չրերը, պետք է զգոն լինենք: «Պետական այրերը եւ մարմինները պետք է պարտադիր անդրադառնան, որ չունենանք նաեւ նախորդ տարվա նախադեպը»,- եզրափակեց Դավիթ Պիպոյանը:
